Bodo Weber, ekspert për Ballkanin dhe bashkëpunëtor i lartë i Këshillit për Politika Demokratike në Berlin, beson se problemi në bisedimet ndërmjet ndërmjetësve perëndimorë me presidentin e Serbisë, Aleksandar Vuçiç dhe kryeministrin e Kosovës, Albin Kurti, është se këto bisedime po zhvillohen me dyer të mbyllura.
Moszbulimi i detajeve nga takimet e ndërmjetësuesve perëndimorë me Kurtin dhe Vuçiçin është sinjal se ende ka bllokim në procesin e dialogut ndërmjet Serbisë dhe Kosovës, ka thënë ai në një intervistë për Evropa e Lirë.
Ai nuk përjashton kriza të mundshme në veri të Kosovës derisa siç thotë ai, të shpallen marrëveshjet dhe të mos u jepet mundësia palëve t’i interpretojnë ato ndryshe.
Termi “kompromis”, jashtëzakonisht i rrezikshëm
“Përderisa sfondi i kësaj qasjeje është i paqartë dhe jo publik, është e vështirë të vlerësohet nëse vërtet ka ndonjë dinamikë, ndonjë plan që shërbehet me afate të caktuara që janë të një konteksti të caktuar dhe të rëndësishëm ndërkombëtar, apo nëse e gjithë kjo është thjesht një përpjekje për t’u ofruar palëve se sa përparim i shpejtë do të bëhej”, tha Weber.
Ai pretendon se termi “kompromis”, i cili përdoret nga ndërmjetësit ndërkombëtarë në kontekstin e mundësisë së arritjes së marrëveshjes ndërmjet Serbisë dhe Kosovës, është “jashtëzakonisht i rrezikshëm”.
“Mendoj se kjo ishte pika kryesore e Vuçiçit dhe regjimit serb në bisedimet për propozimin për shkëmbimin e territoreve”, tha Weber, i cili beson se kjo është disi një përpjekje për të devijuar nga thelbi i dialogut nga bisedimet e para.
Ai pohon se që nga fillimi i dialogut politik në vitin 2012 dhe 2013 ka qenë e qartë se dialogu duhet të përfundojë me pranimin e pavarësisë së Kosovës dhe në fund me njohjen formale ligjore të kësaj pavarësie nga Serbia.
“Do të thotë se fjala apo shprehja ‘kompromis’ është disi e helmuar. Pra, kur Vuçiç e përdor këtë term, ai e përdor atë në kuptimin e përpjekjes për të ndryshuar drejtimin e dialogut dhe kornizën dhe qëllimet e përgjithshme”, sipas Weber.
Negociatat e diskutueshme me Bashkimin Evropian
I pyetur nëse Serbia dhe Kosova e kanë luksin që ta refuzojnë planin evropian, Weber tha se është çështje e vlerësimit nëse ky propozim është vërtet ideal.
“Mendoj se shumë gjëra pas propozimit, përfshirë detajet, nuk janë sqaruar nga aktorët ndërkombëtarë”, shtoi ai.
Sipas mendimit të tij, mund të supozohet se nëse nuk arrihet përparim në bisedimet ndërmjet Serbisë dhe Kosovës, do të ketë ndikim negativ në negociatat për anëtarësimin e Serbisë në Bashkimin Evropian.
“Opsioni i ngrirjes së negociatave të pranimit të Serbisë – në rast se nuk ka përparim në dialog – mund të funksionojë vetëm nëse Serbia mund të identifikohet qartë si përgjegjësja kryesore për dështimin ose bllokimin e negociatave,” thotë Weber. /tesheshi.com/
