Zvonimir Boban përpiqet të ulë euforinë që ka nisur në klubin e Milanit, për 7 blerjet e siguruara deri tani gjatë merkatos. Ish-mesfushori, nuk “sheh” lojtarë të klasit të lartë në skuadër, e shpesh bën krahasimin me periudhën kur luante vetë në Milano.
“Mua nuk më duket ndonjë fushatë e shkëlqyer blerjesh. U duhet dhënë kohë këtyre djemve, por nuk mund të jem entuziast, pasi nuk shoh fenomenë në skuadër. Shumica e tyre, në kohën kur luaja, ndoshta nuk do të kishin vend as në stol”.
Edhe pse këto fjalë mund t’ua kenë “rudhur” disi buzët drejtuesve e tifozëve kuqezi, sërish mbeten për tu dëgjuar, pasi Zvone, ka qenë personalitet në fushë dhe jashtë saj.
Boban që aktualisht është përfshirë në stafin e FIFA-s, “ka marrë në mbrojtje” edhe portierin 18-vjeçar Donnarumma, duke shigjetuar sistemin si funksionojnë sot mardhëniet mes lojtarit dhe klubit.
Më vjen pështirë me mënyrën si po e trajtojnë një djalosh kaq të ri. Me sa duket, askush rreth tij nuk do t’ia dijë për të mirën e këtij talenti, por vetëm si të nxjerrë përfitime prej tij. Shpresoj shumë, që e gjitha kjo që po I ndodh, ta bëjë edhe më të fortë”– thotë Zvonimir Boban, ish-mesfushori elegant me të cilin u dashuruan të gjithë në Milano, rreth 10 vjet më parë. /tesheshi.com/
