Duke analizuar formën, stilin dhe frymën e protestave të opozitës, kreu i LIBRA-s, Ben Blushi ka paralajmëruar dhe ndodhjen e një “21 janari demokrat”. “Nuk e di si e kur, por mund të ndodhë”, tha ish-deputeti socialist në Opinion-in e së enjtes. Komentet e tij u bënë ndërsa bëri një qasje krahasuese mes llojit të reagimit të opozitës së djeshme, ku bënte pjesë dhe ai, dhe kësaj të sotmes.
Duke qenë kritik ndaj formave të opozitës së Ramës, Blushi tha se të njëjtat po përdor sot dhe Basha. “Bojkot parlamenti ata, bojkot parlamenti këta; çadër ata, çadër këta, ata nuk votonin tre ligjet, këta nuk votojnë Vettingun; dhe tashmë prite kur të ndodhë dhe një 21 janar”, komentoi Blushi.
Opozita ka paralajmëruar një protestë të përshkallëzuar në Kavajë, pikërisht ditën e zgjedhjeve më 7 maj, dhe kjo është parë si një tentativë destabilizuese. Përfoljet se ekziston një skemë “21 janari” në projektin opozitar, gjalluan që para protestës së 18 shkurtit, që çoi në ngritjen e çadrës në bulevard, e cila vijon të jetë e ngrehur sot e kësaj dite duke sjellë një ngërç të rëndë politik. /tesheshi.com/
