Përveç çadrës së opozitës para kryeministrisë, Rama dhe PS po sulmohen ashpër edhe nga Ben Blushi, kryetar i LIBRA-s, dikur deputet e anëtar i forumeve të larta drejtuese të kësaj partie. E ka quajtur “Rilindja e Kënetës” apo “Këneta e Rilindjes”, PS-në e Ramës.
“Ka njerëz që ende me pyesin pse u largova nga Rilindja dhe vendosa te krijoj LIBRA. Po përshkruaj vetëm kronikën e dy ditëve te fundit. KQZ mbron një deputet që ka plagosur katër vetë. Nuk ia heq mandatin ndërkohë që kërkon të nxjerrë LIBRA jashtë zgjedhjeve. Kryetari i shkarkuar i Kavajës i con shkresë KQZ pasi kjo e ka shkarkuar. Dy nipat e një ish-deputeti rrahin dhe qëllojnë me armë një ish-deputet në Lezhë. Janë veshur policë dhe natyrisht janë të lirë. Një deputet i kërkon falje partisë për një shaka të djalit të tij. Gjithë këta janë Rilindja. A mund të rrija më në këtë kënetë?”
Por fjala “kënetë” është përdorur 20 vjet më parë në betejën e brendshme të PS-së. Ishte kryetari i kësaj partie, Fatos Nano, kur në betejë me kundërshtarët e tij brenda PS-së në vitin 1996 lëshoi një lumë akuzash, ndër të cilat edhe “PS është këneta e politikës shqiptare”.
Ishte 8 korriku i vitit 1996 kur Komiteti i Përgjithshëm Drejtues i PS-së ishte mbledhur për të diskutuar mocionin për debat të Fatos Nanos. E kishte dërguar këtë mocion nga burgu i Bënçës, ku po vuante dënimin pas burgosjes së tij nga Berisha. Në atë kohë, brenda Partisë Socialiste ishin krijuar qartazi grupet kundërshtare. Grupi i Fatos Nanos kishte përballë Ilir Metën, Servet pëllumbin, Namik Doklen e shumë prej drejtuesve kryesorë politikë të PS-së së asaj kohe. Por kishte në mbështetje të tij drejtues po kaq të fortë, siç ishte Gramoz Ruçi e të rinj të rëndësishëm, mes tyre dhe Pandeli Majko.
KPD-ja e asaj dite e pranoi mocionin për debat të Nanos. Duke e konsideruar PS-në si një “kënetë të politikës shqiptare”, Nano kërkonte refelektimin e KPD-së për të bërë ndryshimet e pasqyruara në mocion.
Ai përsëriti akuzat për prirje marksiste të drejtuesve, ndërsa nga ana tjetër theksoi se pjesëmarrja e përfaqësuesve të PS-së në dialog me PD pa kushte, është një qëndrim që nuk i shërben partisë, duke pasur parasysh farsën elektorale të 26 majit. Në atë kohë një grup drejtuesish të PS-së kishin vendosur të uleshin në dialog me PD-në, edhe pse kishin bojkotuar zgjedhjet 26 majit dhe nuk i kishin pranuar rezultatet e tyre.
Në përgjigje të Nanos, një prej figurave të rëndësishme, anëtar kryesie dhe anëtar i KPD-së, gjithashtu deputet, Dritëro Agolli, replikoi ashpër me Nanon: “Nëse PS-ja është kënetë, ti je buf kënete”.
Ndërkohë kishte nisur një proces bisedimesh mes përfaqësuesve të PS dhe atyre të PD-së, për situatën politike pas zgjedhjeve të 26 majit.
Servet Pëllumbi u kundërpërgjigj duke e cilësuar reformimin e PS-së si një shkrirje të mocionit të Nanos me punën e kryesisë dhe organeve të tjera në PS. Ishte koha të pranohej ndryshimi, por edhe të shfaqej hija e mitit të unitetit të partisë, ndonëse beteja e zhvilluar linte pak zgjidhje të tjera. Mocioni u diskutua në kongresin që u mblodh ato ditë dhe siç ka ndodhur aso kohe e ndodh gjithnjë nëpër partitë politike, betejën e fitoi krahu i më të fortit, në rastin konkret i Fatos Nanos.
Megjithatë, PS u cilësua në atë kohë si “Këneta e politikës shqiptare” nga vetë kryetari i saj, ndërsa sot PS konsiderohet si kënetë nga ish-deputeti i kësaj partie, anëtarë i forumeve të larta drejtuese të saj, Ben Blushi. Sulmet e Blushit ndaj PS-së janë intensifikuar këto kohë, kur ai është larguar nga PS dhe është kryetar i LIBRA-s. U zgjodh disa ditë më parë kryetar i saj përmes votimit elektronik, siç tha ai. Ndërsa Erjon Braçe e cilësoi: kryetar me 99% like në fb”. /tesheshi.com/
