Legalizimi i marijuanës po vret shumë njerëz. Jo ngadalë – edhe pse disa studime sugjerojnë se mund të jetë duke e bërë edhe këtë – por shumë shpejt, në aksidentet rrugore. Dhe kjo është një simptomë më shumë e nxitimit katastrofik të ligjvënësve për të përfituar nga shitjet e kanabisit, pa kryer më parë punën e vështirë dhe më se të nevojshme për t’i mbajtur qytetarët të sigurt.
Në Kanada, vendi që e legalizoi marijuanën për qëllime rekreative që në vitin 2018, një studim i fundit ka zbuluar një rritje prej 475 për qind (gati pesë herë) të vizitave në pavionet urgjencës për shkak të aksidenteve të lidhura me kanabisin në rajonin e Ontarios midis viteve 2010-2021.
Shumë raste të tjera ka të ngjarë të mos zbulohen, për shkak të mungesës së testeve të besueshme për drejtimin e automjetit, teksa drejtuesi është dendur mirë me kanabis. Në SHBA, përqindja e vdekjeve nga aksidentet rrugore që përfshin përdorimin e kanabisit u rrit në 21.5 për qind në vitin 2018, nga vetëm 9 për qind në 2000.
Një analizë zbuloi një rritje mesatare prej 10 për qind të vdekjeve nga aksidentet rrugore, pikërisht pas legalizimit të kësaj lloj droge nga shtete të ndryshme. Në Kaliforni, rritja ishte 14 për qind; në Oregon 22 për qind. Kjo gjë tregon se më shumë se 1000 amerikanë mund të vdesin çdo vit, vetëm për shkak të aksidenteve të lidhura me marijuanën
Dhe kjo shifër vetëm në shtetet ku ka ndodhur legalizimi. Duke pasur parasysh lehtësinë e transportit të drogës nëpër linjat shtetërore, numri real mund të jetë shumë më i lartë. Shkaku i këtyre vdekjeve nuk është vetëm vetë droga. Por edhe injoranca.
Një studim i kohëve të fundit, zbuloi se rreth gjysma e përdoruesve të marijuanës mendonin se ishte normale të drejtonin makinën edhe vetëm 90 minuta pas tymosjes së kësaj droge. Por mënyra e tyre e drejtimit në një automjet të simuluar, ishte po aq e keqe sa kishte qenë edhe pas vetëm 30 minutash.
Të dhënat më të mira që janë në dispozicion, sugjerojnë që njerëzit duhet të presin të paktën katër orë pas konsumit të kanabisit, përpara se të hipin dhe drejtojnë një makinë. Madje disa ekspertë rekomandojnë një pushim prej 8 deri në 12 orë.
Fakti që njerëzit nuk e dinë këtë është faji i qeverive, të cilat kanë nxituar me vetëdije drejt legalizimit të kësaj droge, pa bërë më parë kërkimet e nevojshme, apo pa miratuar masat e nevojshme mbrojtëse. Në fakt, ata po kryejnë eksperimente të drejtpërdrejta mbi qytetarët e tyre.
Për të adresuar këtë krizë serioze, votuesit duhet t’i mbajnë zyrtarët përgjegjës për marrjen e dy hapave: rritjen e ndërgjegjësimit publik, dhe zhvillimin e një teknologjie më të mirë të gjurmimit. Lufta kundër pirjes së kanabisit dhe drejtimit të makinës, ofron menjëherë një precedent të dobishëm.
Pasi fushatat e përhapura dhe të sponsorizuara nga qeveria, ndihmuan në stigmatizimin e një sjelljeje të tillë, numri i vdekjeve nga drejtimi i mjetit në gjendje të droguar u përgjysmuan. Një rol luajti edhe zbatimi më i ashpër i ligjit. Për një kohë të gjatë, testet që u bëjnë policët shoferëve në anë të rrugës, ishin të kufizuara tek ecja në vijë të drejtë dhe tek disa ushtrime të tjera bazë.
Mbërritja e pajisjes “Breathalyzer” (që analizon frymën e shoferit) i bëri kanabis-dashësit të mendoheshin dy herë përpara se të ngisnin makinën, menjëherë pasi kishin mbaruar cigaren e tyre me hashash. Deri më tani, përdoruesit e marijuanës nuk po përballen me të njëjtën qasje dekurajuese, pjesërisht sepse teknologjia e testimit në rrugë nuk është aq e besueshme apo aq e përhapur sa duhet.
Qeveritë mund të ndihmojnë në kapërcimin e kësaj pengese, duke mbështetur kërkimin shkencor bazë për të krijuar mjete të tilla. Frika nga arrestimi, është një levë e fuqishme e politikës publike. Për këtë arsye, departamentet e policisë kërkojnë shpesh paraprakisht kontrolle për drejtimin e automjeteve në gjendje të droguar.
Por tani për tani, shumë drejtues mjetesh po ia hedhin u ndëshkuar, dhe publiku po paguan një kosto shumë të lartë. Një farmakolog që ka studiuar efektet e marijuanës, dha një vlerësim të zymtë mbi gjendjen e sigurisë rrugore. Në shtetin e Kolorados në SHBA, ku ai jep mësim, sipas një studimi del se vdekjet nga aksidentet rrugore u rritën me 16 për qind pasi u legalizua kanabisi.
Nga shumë gabime skandaloze që kanë bërë qeveritë me legalizimin e marijuanës, përfshirë shpërfilljen e ndikimit të drogës në zhvillimin e trurit të të rinjve, që mund të dëmtojë një brez të tërë, dështimi për ta marrë seriozisht sigurinë rrugore është ndër më të këqijat.
Derisa të adresohet ai, në aksidente do të vdesin shumë njerëz të tjerë, dhe familjeve të tyre do t’u mbetet vetëm të pyesin: Çfarë janë duke pirë vallë udhëheqësit e zgjedhur me votat tona? /tesheshi.com/
