BE-ja me shumë gjasë do të autorizojë nisjen formale të negociatave për anëtarësim të Shqipërisë dhe Maqedonisë Veriore muajin që vjen, me shpresat se e ardhmja e anëtarësimit në Union do të ndihmonte rehabilitimin e rajonit të trazuar të Ballkanit – shkruan Bloomberg.
“Në dritën e progreseve të arritura në reforma”, takimi i ministrave të BE-së në Luksemburg më 15 tetor do të vendosë të hapin negociatat me qeveritë në Tiranë dhe Shkup, siç është thënë në një draft të një komunikate që ka qarkulluar, e që i ka rënë në duar edhe Bloomberg.
Ndërsa deklaratat ende mund të ndryshojnë, një draft i mëhershëm, gjithashtu i kaluar nëpër duart e Bloomberg, nuk përfshijnë rekomandimet për nisjen e bisedimeve.
Një përpjekje e ngjashme për të çelur nisjen e tyre dështoi në qershor, kur vendet si Franca, Holanda, Gjermania dhe Danimarka, refuzuan rekomandimet.
Sqarimi i situatës na kthen prapa, kur disa qeveri të BE-së janë acaruar nga dështimi i shteteve të lindjes për të mbështetur sundimin e ligjit dhe luftën kundër korrupsionit.
Kështu, së fundmi, ata janë bërë më të kujdesshëm që të pranojnë anëtarët e rinj në klubin më të madh tregtar në botë, ku njerëzit, mallrat dhe shërbimet mund të lëvizin lirshëm.
Vendet si Polonia, Hungaria dhe Rumania janë ndër përfituesit më të mëdhenj të fondeve strukturore të BE-së, e megjithatë krahu ekzekutiv i bllokut deri më tani nuk ka arritur t’i detyrojë ata të bien në linjë me standardet e kërkuara.
Në komunikatën e saj në qershor për zgjerimin, BE tha se pranimi i anëtarëve të rinj duhet të marrë parasysh aftësinë e bllokut për t’i integruar ato.
Edhe pse bisedimet e pranimit zgjasin me vite – apo edhe me dekada, si në rastin e Turqisë – përfundimi i tyre nuk është i garantuar. Fillimi i procesit është një fitore për qeverinë e Maqedonisë së Veriut e cila kishte investuar pjesën më të madhe të kapitalit të saj politik në një marrëveshje me Greqinë për të ndryshuar emrin kushtetues të ish-republikës jugosllave, me shpresën se kjo do t’i hapte rrugën anëtarësimit në BE.
Qeveria e re greke ka thënë se nuk pajtohet me marrëveshjen e bërë midis Maqedonisë së Veriut dhe qeverisë paraprake, por shtoi nuk do të kërkojë ta anulojë atë për shkak të nevojës për të ruajtur vazhdimësinë në marrëveshjet ndërkombëtare. /tesheshi.com/
