Ish-kryetari i bashkisë së New York-ut, Michael Bloomberg, nuk ka vendosur ende nëse do të kandidojë në zgjedhjet presidenciale të SHBA-së, por ka nisur një fushatë në internet 100 milion dollarëshe kundër Presidentit Donald Trump.
E teti në listën e Forbes për njerëzit më të pasur në botë, Bloomberg konfirmoi në Twitter nisjen e asaj fushate, të njoftuar më parë nga këshilltari i tij Howard Wolfson në New York Times.
“Ky është momenti kur të gjithë duhet të përfshihen. Ne do të luftojmë drejtpërdrejt me Trump”, ka shkruar Wolfson.
Këto reklama në internet, të cilat nuk përfaqësojnë Michael Bloomberg por kritikojnë Donald Trump, shënjestrën e kanë në Arizona, Michigan, Pennsylvania dhe Wisconsin, katër shtete që mund të vendosin midis demokratëve dhe republikanëve në vitin 2020, dhe për këtë arsye konsiderohen si vendimtare për fitoren e zgjedhjeve presidenciale.
Ish-kryetari i bashkisë së New York-ut, 77 vjeç, ka ndërmarrë disa hapa ditët e fundit për të kandiduar për nominimin demokratik dhe ka regjistruar emrin si kandidat në Alabama dhe Arkansas.
Disa besojnë se pasuria e tij dhe cilësitë e një biznesmeni dhe një ambasadori për ndryshime klimatike, e bëjnë atë sfiduesin më të mirë të Trump.
Por të tjerët, në anën e demokratëve të krahut të majtë si Elizabeth Ëarren dhe Bernie Sanders, shohin në të mishërimin e frikës së miliarderëve nga taksat e mëdha për të lehtësuar pabarazitë. /tesheshi.com/
