Dhjetë zyrtarë të Kremlinit po vënë në dyshim vendimin e presidentit rus Vladimir Putin për të shkuar në luftë në Ukrainë, duke thënë se ishte një gabim katastrofik që do ta çonte vendin shumë prapa.
Sipas Bloomberg, një numër i vogël por në rritje i zyrtarëve të lartë të Kremlinit kundërshtojnë planet e luftës të presidentit të tyre në vendin e trazuar.
Dhjetë zyrtarët, të cilët folën në kushte anonimiteti sepse nuk ishin të autorizuar të flisnin për mediat, janë anëtarë të agjencive të ndryshme të larta qeveritare dhe kompanive shtetërore.
Edhe pse ata kanë shprehur pikëpamjet e tyre në përpjekje për ta bindur atë të ndryshojë strategjinë, Putini i ka “mbyllur veshët”.
Ai refuzon çdo paralajmërim nga zyrtarët për kostot e rënda ekonomike dhe politike të luftës.
Në fakt, disa prej tyre kanë frikë se njeriu i fuqishëm i Kremlinit mund të përdorë, ndonëse në mënyrë të kufizuar, armët bërthamore nëse mendon se “misioni i tij historik”, siç e sheh ai luftën në Ukrainë, nuk do të ketë rezultatet e pritura.
Megjithatë, sipas Bloomberg, pavarësisht nga zyrtarët “disidenë” në Kremlin, Putin ka mbështetjen e elitës ruse, por edhe të shumicës së rusëve që besojnë se një konflikt midis vlerave të Rusisë dhe Perëndimit është i pashmangshëm.
Dhe për këtë arsye, shkruan Bloomberg, Putin këmbëngul se vendimi për të pushtuar Ukrainën ishte i duhuri.
Por gati tetë javë pasi urdhëroi pushtimin e Ukrainës, vijon Bloomberg, Putini po humbet gjithnjë e më shumë trupa, imazhi i atdheut të tij po njolloset ndërsa vret civilë dhe Rusia po “izolohet” nga komuniteti ndërkombëtar.
Ukrainasit po rezistojnë fuqishëm, duke mbrojtur çdo masë të territorit të tyre dhe duke mos dorëzuar armët e tyre, diçka që, me sa duket, nuk është marrë parasysh nga “cari” i Rusisë. /tesheshi.com/
