Komiteti i Lartë i Negociatave, blloku kryesor opozitar sirian, ka parashtruar në Londër, në një takim ku ka patur dhe ministra të Jashtëm nga vende të ndryshme të botës, një plan për tranzicionin politik në Siri, si dhe për një armëpushim, për t’i dhënë fund konfliktit të përgjakshëm disavjeçar.
Sipas Komitetit të Lartë të Negociatave, procesi i propozuar do të nisë me gjashtë muaj negociata për ngritjen e një administrate kalimtare, të përbërë nga njerëz të opozitës, të qeverisë e të shoqërisë civile.
Në fund të këtyre gjashtë muajve, Esadit do t’i kërkohet ta lërë detyrën e presidentit, ndërsa organi kalimtar do ta drejtojë vendin në 18 muajt e ardhshëm, pas së cilëve do të ketë zgjedhje.
Blloku opozitar sirian, Komiteti i Lartë i Negociatave, e ka bërë të qartë se nuk do të pranojë asnjë marrëveshje mes SHBA-ve dhe Rusisë që ndryshon së tepërmi prej kushteve të tij.
Negociatori kryesor i opozitës, për pak kohë në vitin 2012 dhe kryeministër i Sirisë, Rijad Hixhabi, do të deklaronte, “Nëse ajo për çka pajtohen rusët dhe amerikanët është shumë e ndryshme nga ajo për të cilën aspirojnë sirianët, atëherë ne nuk do ta pranojmë atë.”
“Ne e ndjejmë se duhet të lëvizim në një fazë të re, dhe faza e re nuk mund të ngjasë pa një tranzicion politik,” ka shtuar ai.
Ndërkaq, John Kerry e Sergey Lavrov pritet të kenë sot bisedime mbi Sirinë në Gjenevë. /tesheshi.com/
