Deputeti demokrat Aldo Bumçi e ka përligjur bllokimin e rrugëve dukë thënë se kjo ndodh në çdo protestë.
Duke folur për Ora News nga një prej kryqëzimeve të bllokuara në Tiranë, Bumçi mohoi që partia e tij të jetë zhytur në paligjshmëri me këtë masë ekstreme.
“Bllokimi i rrugës nuk është i jashtëligjshëm. Sa herë ka protesta ka bllokim të rrugëve. Nuk është problem bllokimi i rrugës për një orë”, tha deputeti demokrat.
Për më tepër, Bumçi ka akuzuar policinë si shkelëse të ligjit, por pa e saktësuar se në ç’rast dhe në ç’pikë.
“Protesta është paqësore, jemi të vendosur të vazhdojmë kështu deri në fund. Edhe forcat e rendit nuk kanë provokuar me përjashtim të 2-3 rasteve kur iu afruan protestuesve për ti filmuar.Pjesëmarrja është shumë e mirë. Do të thoja që qytetarët i janë përgjigjjur protestës pavarësisht një presion antiligjor që iu bë nga policia. Kur policia shkel ligjin do të thoja se është bërë pjesë politike”, shtoi ai.
Ndërklohë, siç dhe u pa në terren, policia kishte marrë masa që të shmangë përballjen e protestuesve me njerëzit e bllokuar në automjete. Në gjithë pikat e bllokuara, ajo u ka ofruar rrugë alternative për të kaluar. /tesheshi.com/
