Sekretari amerikan i Shtetit Antony Blinken tha të mërkurën se liderët e Serbisë dhe Kosovës duhet të bëjnë kompromise të vështira për të normalizuar marrëdhëniet mes dy vendeve, të cilat do të sjellin siguri dhe prosperitet për të gjithë qytetarët e Ballkanit Perëndimor.
“Jam i bindur se normalizimi i marrëdhënieve ndërmjet Serbisë dhe Kosovës do t’i sjellë siguri dhe prosperitet Serbisë dhe të gjithë qytetarëve të Ballkanit Perëndimor. Liderët e Kosovës dhe të Serbisë do të bëjnë kompromise të vështira për t’i arritur këto synime, por shpërblimet për popullin serb dhe gjithë rajonin do të jenë të mëdha”, tha ai duke uruar Ditën e Shtetësisë së Serbisë.
Sekretari amerikan i Shtetit i bëri thirrje Serbisë që të mbështesë Ukrainën kundër luftës së paprovokuar, të pajustifikuar dhe brutale të Rusisë dhe shtoi se SHBA mbështet fuqishëm aspiratat evropiane të Serbisë, transmeton Beta.
Dialogu Kosovë-Serbi filloi në vitin 2011, ku u arrit marrëveshja për themelimin e Bashkësisë së Komunave Serbe (ZSO) në Kosovë. Kjo ndodhi në vitin 2015, kur kryeministër e më pas president ishte Hashim Thaçi. Por Gjykata Kushtetuese e Kosovës e rrëzoi Asocacionin si antikushtetues, çuar aty nga Vetëvendosje, ahere në opozitë, e cila e kundërshtoi ashpër, etiketuar nga Kurti si “Zajednica”.
Kurti: Së pari njohja, pastaj ZSO
Gjykata Kushtetuese e Kosovës vendosi se disa pika të statutit të ZSO-së nuk janë në përputhje me Kushtetutën e Kosovës.
Presidenti serb Aleksandar Vuçiç tha javën e kaluar se derisa autoritetet e Kosovës t’i përmbushin obligimet e tyre nga marrëveshjet e mëparshme, ai mund të shkojë në Bruksel vetëm si turist dhe si parakusht kërkoi që Bashkimi Evropian, i cili është garantuesi i marrëveshjes me Kosovën, të mundësojë formimin e ZSO.
Përfaqësuesit e BE-së dhe zyrtarët amerikanë kërkojnë që Kosova të respektojë obligimet nga Marrëveshja e Brukselit dhe të themelojë ZSO-në, me të cilën pajtohet së fundi edhe kryeministri Kurti, por që kërkon që para kësaj Kosova dhe Serbia të arrijnë njohjen reciproke.
Kurti tha të hënën se është i gatshëm të takohet me Vuçiçin, por vetëm për të diskutuar propozimin evropian për normalizimin e marrëdhënieve. /tesheshi.com/
