Administrata e Joe Biden do të kthehet në marrëveshjen bërthamore iraniane me kusht që Teherani të kthehet në detyrimet e tij dhe më pas do të negociojë një marrëveshje “më të gjatë dhe më të fortë”, tha Sekretari i Shtetit i SHBA Antony Blinken në një intervistë me NBC News.
Gjatë intervistës, Blinken tha se Irani është muaj larg nga zhvillimi i materialit bërthamor të mjaftueshëm për të bërë një bombë dhe shtoi se kjo është çështje e “javëve”, ndërsa Teherani vazhdon të shkelë dispozitat e marrëveshjes së vitit 2015.
Irani filloi shkeljen e marrëveshjes pasi administrata e ish-Presidentit Donald Trump tërhoqi Shtetet e Bashkuara nga marrëveshja në 2018, gjë e cila u ndesh me kritika nga publiku ndërkombëtar.
Sipas marrëveshjes, sanksionet ndaj Iranit u hoqën dhe ai fitoi një akses më të madh në ekonominë botërore, por Teheranit iu desh të pranonte masa për të bllokuar zhvillimin e armëve bërthamore.
Mundësia e sanksioneve të reja
Blinken tha se Uashingtoni do të shqyrtojë gjithashtu disa tema të tjera të gjetura në marrëveshje, duke përfshirë lirimin e shtetasve amerikanë nga burgjet iraniane.
Irani ka njoftuar më parë se nuk do të rinegociojë marrëveshjen bërthamore dhe fajësoi Shtetet e Bashkuara për tërheqjen e thjeshtë prej saj.
“Marrëveshja bërthamore është një marrëveshje ndërkombëtare shumëpalëshe e ratifikuar nga Këshilli i Sigurimit i Kombeve të Bashkuara. Nuk është subjekt i rinegocimit derisa palët që e nënshkruan atë të ndryshojnë,” tha zëdhënësi i Ministrisë së Jashtme iraniane Saeed Khatibzadeh.
Blinken foli gjithashtu për sanksione të reja të mundshme kundër Koresë së Veriut dhe Rusisë, pasi kjo e fundit ka arrestuar liderin e opozitës Alexei Navalny. /tesheshi.com/
