Policia është vënë në gatishmëri të lartë në kryeqytetin grek përpara mbërritjes dhe vizitës së Presidentit të SHBA-ve, Barack Obama. Gjatë vizitës dy ditore të Obamës, e cila nis ditën e sotme, disa pjesë të Athinës di të bllokohen dhe autoritetet kanë marrë masat ndaj çdo sulmi terrorist të mundshëm.
Rreth 4 mijë oficerë policie do të ndodhen në rrugët dhe sheshet e Athinës ndërsa do të ndalohet kalimi me makina por edhe i këmbësorëve në qendër të kryeqytetit. Në mbështetje të forcave greke do të jenë edhe rreth 300 agjentë amerikanë, të cilët do të vëzhgojnë kryeqytetin për mbrojtjen e presidentit.
Ditën e hënë mediat dhe policia greke bënë me dije se një organizatë terroriste greke ka kërcënuar për atentate gjatë vizitës së Barack Obamës në Athinë. Duke folur për Ekathimerini zëdhënësit e policisë kanë thënë se autoritetet kanë maksimizuar masat e sigurisë, në mënyrë që të shmanget çdo lloj sulmi terrorist.
Sa i takon kërcënimit terrorist mësohet se ka qenë organizata Revolucionare e Vetëmbrojtjes ajo që ka dërguar kërcënimin. Para pak ditësh kjo organizatë ka marrë përsipër bombën në ambasadën e Francës në Athinë.
E njëjta organizatë ka marrë përgjegjësinë edhe për të shtënat me armë në ndërtesën e ambasadës meksikane në Athinë më 31 gusht 2016./tesheshi.com/
