Tre shtete, Shqipëria, Italia dhe Mali i Zi do të kryejnë patrullime të përbashkëta me synim rritjen e kontrollit detar në Adriatik dhe parandalimin e trafikut të lëndëve narkotike apo qytetarëve.
Drejtuesit e policive kufitare të tre vendeve kanë zhvilluar një takim të përbashkët për të intensifikuar bashkëpunimin e strukturave kundër trafiqeve të paligjshme.
Delegacioni shqiptar kryesohej nga Drejtoresha e Departamentit për Kufirin dhe Migracionin Aida Hajnaj. Qëllimi i takimit ishte rritja e bashkëpunimit mes të tre vendeve në fushën e kufirit dhe migracionit.
Intensifikimi i luftës ndaj trafiqeve të paligjshme në kufirin blu, por edhe në atë të gjelbër ishte një çështje që zuri një vend të veçantë gjatë bisedimeve. Gjatë takimit u vendos për një protokoll trepalësh për patrullimet e përbashkëta në hapësirën detare të tre vendeve në detin Adriatik.
Mes drejtuesve të policive kufitare të tre vendeve u dakordësua shkëmbimi i menjëhershëm i informacioneve në lidhje me të gjitha mjetet detare që ndryshojnë vendbazimet dhe të atyre që deklarojnë se do të lëvizin drejt njërit nga tre vendet. Gjithashtu, u ra dakord për një shkëmbim informacionesh të menjëhershme në lidhje me imigracionin e paligjshëm. /tesheshi.com/
