Fondacioni “Mozarteum de Salzbourg” njoftoi të mërkurën se ka blerë në ankand për 237.000 euro një prej dorëshkrimeve më të rralla të Wolfgang Amadeus Mozart (1756-1791), që mungonte në koleksionet publike.
Prezantuar dje në kuadër të festivalit të muzikës në Salsburg, qyteti i lindjes së kompozitorit, dokumenti prej 12 faqesh dhe me një format mesatar mbante transkripte nga dora e të riut Mozart, të nëntë lëvizjeve të një “Stabat mater” të Eugenio di Ligniville (1727-1778), kompozitor i njohur italian.
Vlerësuar 167.000 stërlina (237.000 euro) nga Shtëpia e Ankandeve “Sotheby’s” në Londër, dorëshkrimi, që daton në vitin 1773 sipas ekspertëve, mban gjithashtu komente të babait të Mozartit, Leopold.
“Pjesa më e madhe e dorëshkrimeve të Mozartit ndodhen që prej shumë kohësh në koleksionet e prekshme për publikun”, theksoi Fondacioni “Mozarteum de Salzbourg” në një komunikatë.
Sipas Fondacionit, ky dokument ka një rëndësi të veçantë, sepse ai provon interesin e qëndrueshëm të familjes Mozart për artin e linjës melodike të Ligniville, i cili ashtu si Mozarti ishte anëtar i akademisë së famshme filarmonike të Bolonjës. /tesheshi.com/
