SHBA janë të shqetësuar lidhur me planet e Turqisë për të blerë sistemit raketor rus tokë-ajër S-400
Pentagoni ka kritikuar planet e Turqisë për blerjen e sistemit të mbrojtjes ajrore ruse S-400, në vend të investimit në teknologji të NATO-s.
Në të vërtetë, negociatat mes presidentit turk Rexhep Tajip Erdogan me Rusinë janë në zhvillim e sipër, me qëllim të furnizimit të Ankarasë me sistem raketor tokë-ajër S-400.
Zëdhënësi i Pentagonit, Navy Captain Jeff Davis tha se Pentagoni është i shqetësuar në lidhje me prokurimin e aleatit të SHBA-ve në NATO me teknologji ruse, sepse kjo teknologji ruse nuk do të mund të përshtatet me pajisje të tjera të përdorura nga Aleanca.
“Në përgjithësi, do të ishte ide e mirë që aleatët të blejnë pajisje të ndërveprueshme,” tha Davis.
Mediat turke në ditët e fundit kanë raportuar se marrëveshja me Rusinë për blerjen e sistemit S-400, është në fazën e finalizimit, sipas AFP.
Sistemi S-400 rrëzon të gjitha objektet fluturuese – nga avionët deri te raketat balistike dhe kruiz.
Sistemi në të njëjtën kohë kap në shënjestër 36 caqe, ndërkohë që gama e goditjes së cakut është deri në 400 kilometra, kurse në lartësi deri në 30 kilometra. Sistemi Triumph S-400 u fut në ushtrinë ruse në vitin 2007.
Edhe pse nuk ka asnjë informacion të saktë, ekspertët ushtarakë vlerësojnë se një bateri e S-400 do të kushtojë 400 milionë dollarë.
Ai përfshin tetë raketahedhës, 112 raketa dhe njësinë e kontrollit me dy radarë dhe automjete ndihmëse. /tesheshi.com/
