Ish-presidenti i FIFA-s, Sepp Blatter, ka kritikuar vendimin e ombrellës së futbollit botëror për të mbajtur Kupën e Botës në vitin 2030 në gjashtë shtete të tre kontinenteve.
Maroku, Spanja dhe Portugalia janë zgjedhur mikwpritws të turneut të vitit 2030, ndërsa Uruguai, Argjentina dhe Paraguai gjithashtu do të presin ndeshjet hapëse për të shënuar njëqindvjetorin e turneut, tha FIFA në një njoftim surprizë të mërkurën.
Vendimi u kritikua nga Sepp Blatter, i cili ishte president i FIFA-s nga viti 1998 deri në vitin 2015 përpara se të shkarkohej pas një hetimi për korrupsion.
“Është absurde të prishësh Kupën e Botës në këtë mënyrë”, tha Blatter për gazetën zvicerane SonntagsBlick.
“Finalja e Kupës së Botës duhet të jetë një ngjarje kompakte”, tha ai, duke shtuar se është e rëndësishme për identitetin e eventit, për organizimin dhe për vizitorët.
Blatter, dikur një nga figurat më të fuqishme të futbollit, kritikoi më parë FIFA-n për dhënien e kampionatit të 2022 Katarit, duke thënë se vendi i Lindjes së Mesme ishte thjesht shumë i vogël.
87-vjeçari tha se turneu i vitit 2030 duhet të mbahet në Amerikën e Jugut, duke shënuar 100 vjetorin e turneut të parë që ai priti, i cili u fitua nga Uruguai.
“Për arsye historike, Kupa e Botës 2030 duhet t’i përkiste ekskluzivisht Amerikës së Jugut”. /tesheshi.com/
