Lulzim Kastrati nga Peja, është blerësi i Audi Q7-shit më të famshëm në Kosovë. Ai e bleu ish-veturën e ish-kryetarit të Prishtinës, Isa Mustafa, të cilën kryetari aktual, Shpend Ahmeti nuk e përdori asnjëherë.
22 mijë e 500 euro ishte shuma që dha pejani, derisa ajo fillestare ishte 21 mijë euro sot në Shtëpinë e Ankandeve.
Me të hyrë në makinë, pronari i ri i Q7-shit ka thënë për KTV-në se “ndjehet mirë që paratë nga kjo blerje do të shkojnë për bamirësi”.
Ai tha se i vjen mirë që vetura ka qenë e ish-kryetarit Mustafa, ndërsa ka thënë se nuk e ka blerë veturën për “t’i ndihmuar Shpend Ahmetit që të mbajë premtimin e tij për shitjen e kësaj veture luksoze”.
Pas shitjes së veturës, Ahmeti ka thënë se Audi Q7 përfaqësonte atë që s’duhej në sektorin publik, shitja të shërbejë si mesazh
Ahmeti ka thënë se kjo veturë luksoze përfaqësonte atë që nuk duhet të jetë në sektorin publik, prandaj shitja e saj, sipas tij, duhet shërbyer si mesazh që të mos blihen më vetura të tilla.
“Sot u shit edhe Audi Q7. Një premtim simbolik më në fund u realizua. Simbolik sepse si përqindje e buxhetit nuk është e madhe. Por simbolik sepse një veturë e shtrenjtë përfaqësonte çdo gjë që nuk na duhet në sektorin publik. E shtrenjtë, me xhama të zi për t’u barrikaduar dhe me 26 litra shpenzime. Në mënyrë simbolike paratë nga shitja do t’i përdorim për me të rrezikuarit e komunës tonë. Le të jetë edhe mesazh që makina të tilla të mos blehen më, së paku jo me para publike. Le të jetë edhe mesazh për destinimin e buxhetit në të gjitha komunat e institucionet”, ka deklaruar Ahmeti.
Në fakt, që kur e mori mandatin, në dhjetor të vitit 2013, Shpend Ahmeti kishte premtuar se do ta shesë këtë veturë.
Audi Q7, me vit të prodhimit 2011, motor 4.2 dizel – me tërheqje katërrotëshe dhe vetëm 75 mijë kilometra të kaluara, sipas drejtuesve të ankandit, është e gatshme për shitje.
Ankandi i të shtunës ishte i treti për këtë veturë./tesheshi.com/
