Sipërmarrësit shqiptarë e konsiderojnë Kosovë si terrenin më të sigurt për të patur një aktivitet të suksesshëm. Kjo pasi që prej vitit 2007 rreth 900 kompani shqiptare ushtrojnë aktivitet të ligjshëm e normal në këtë zonë.
Ky fakt është konfirmuar nga vetë ministrja e Tregtisë dhe Industrisë së Kosovës, Hykmete Bajrami gjatë një takimi me homologen e saj shqiptare, Milva Ekonomi e cila ndodhej në Prishtinë në kuadrin e Panairit të përbashkët “Bli Shqip”, që zhvillohet çdo vit në kuadrin e Festës Kombëtare mbarëshqiptare.
“Janë 900 kompani me kapital nga Shqipëria që ushtrojnë aktivitetin në Kosovë që nga 2007, ndërkohë që 14 prej tyre kanë punësuar 1400 punëtorë në Kosovë”, tha Bajrami. Ajo theksoi se marrëveshjet e fundit mes dy vendeve kanë lehtësuar tregtinë mes dy vendeve.
“Kjo është një ngjarje e madhe për sipërmarrjen shqiptare dhe atë kosovare për njohjen e produkteve shqiptare në tërësi. Produktet tona kanë nevojë të regjistrohen si marka dhe po punojmë shumë për këtë gjë, por dhe konsumatori ka nevojë të mbrohet, ndaj dy palët po punojnë në çështjen e sigurisë ushqimore. Nuk ka pengesë që e ndal këtë bashkëpunim. Të gjithë vijnë me kënaqësin në panairin “Blej Shqip” u shpreh ministrja Ekonomi.
Ajo tha po ashtu se duhet bërë më shumë për të krijuar mundësi që produktet shqiptare të jenë të kokurueshme në tregun ballkanik dhe atë europian dhe për këtë, sipas saj, duhen ndërmarrë veprime konkrete në të ardhmen.
Gjithashtu, Ekonomi u shpreh se duhet zgjeruar bashkëpunimi në disa sektorë të rinj dhe në shkëmbimin e forcës së punës mes dy vendeve./tesheshi.com/
