Partia Demokratike mbetet e vendosur për të kundërshtuar futjen e biznesit të vogël në skemën e TVSH.
Kryetari i grupit parlamentar të PD-së, Edmond Spaho, tha se do përdoren të gjithë mekanizmat parlamentarë për ta penguar, ndërsa bëri një panoramë sesa pritet të rriten çmimet në vend nëse kjo ndodh, raporton Oraneës.
“Do ta kundërshtojmë këtë iniciativë me mjete që na jep Kuvendi gjatë debatit si në Komisione ashtu dhe në seancë plenare, do kërkojmë konsulta me gjithë palët e interesuara. Do të jetë një lëvizje negative, do shoqërohet me rritje të çmimeve për konsumatorët. Sipas përllogaritjeve të para që kemi bërë ketë një rritje mesatarisht të çmimeve të mallrave ushqimore të fruta-perimeve prej 8-10% pa folur për normën e inflacionit 1-3%, për shërbimet do lëvizë nga 12-15%”, tha Spaho.
Sipas tij, mund të ketë dhe mbi këtë dhe nën këto nivele, po flas për mesatare.
“Rritja e çmimeve do shoqërohet me rënie të konsumit, jo vetëm përkeqësimin e nivelit të jetesës së qytetarëve por me rënie konsumi dhe kjo do ketë efekte në biznese. Një pjesë e mirë e bizneseve të vogla kanë për të falimentar sepse nuk do i rezistojnë tregut”, shtoi ai. /tesheshi.com/
