Kompanitë greke bëhen gati të sjellin investimet e tyre në Shqipëri, pas ligjit të ri që rrit taksat në këtë vend.
Ka qenë Presidenti i Dhomës së Tregtisë së Greqisë, Vasili Korkidis, i cili ka deklaruar për gazetën “Kathimerini” se janë rreth 60 mijë bisnese që janë gati të shpërngulen në Shqipëri, Bullgari dhe Qipro.
Madje disa prej tyre janë regjistruar dhe kanë marrë NIPT-et e tyre në Qendrën Kombëtare të Regjistrimit.
Sipas Dhomës së Tregtisë, këto NIPT-e nuk janë aktivizuar ende, por hapja e tyre tregon se bizneset greke po bëjnë përgatitje për t’u shpërngulur në vendet fqinje, ku taksat janë më të ulëta dhe nuk ka kontrolle mbi kapitalin.
Të dhënat tregojnë se, deri më tani, përfituesja kryesore nga eksodi i kapitalit grek ka qenë Bullgaria, ku prej vitit 2009 janë shpërngulur mbi 10 mijë biznese greke, të cilat kanë investuar në total mbi 4.5 miliardë euro në ekonominë bullgare.
Mediat në Athinë i bënë jehonë javë më parë, lajmit që qeveria shqiptare do të hiqte taksën për biznesin e vogël nisur nga janari i 2016-s dhe – sipas tyre, – shumë biznese greke mund të transferohen në Shqipëri. /tesheshi.com/
