Prej ditësh flitej për një shtyrje të bisedimeve mbi Sirinë për shkak të mosmarrëveshjeve për pjesëmarrësit në konfliktin sirian që duheshin ftuar. Dhe shtyrja është lajmëruar sot nga i dërguari i posaçëm i OKB-së për Sirinë, Staffan de Mistura.
De Mistura ka mbajtur një konferencë shtypi në Gjenevë, ku ka njoftuar se bisedimet e paqes do të nisin të premten, e se mendohet të zgjasin gjashtë muaj.
Në bisedimet e paqes, ka thënë mes të tjerash i dërguari i OKB-së, do të kërkohet arritja e një armëpushimi në të gjithë vendin, e për të gjitha palët ndërluftuese, duke përjashtuar ISIS-in dhe Frontin en-Nusra.
Ftesat, sipas tij, do të dërgohen të martën, e raundi i parë i diskutimeve ka gjasa të zgjasë dy apo tre javë. Në bisedimet kusht do jetë një armëpushim i njëmendtë, e jo lokal, ka theksuar De Mistura.
Bisedimet e parashikuara të nisin në Gjenevë pasojnë takimet e zhvilluara në Vjenë e në Nju-Jork mes aktorëve rajonalë dhe bashkësisë ndërkombëtare. /tesheshi.com/
