Pas shenjave aspak pozitive të dhëna para pak ditësh teksa pati një pështjellim në lidhje me ftesat për opozitën, pas një shtyrjeje të vogël kohore, e pas mësymjes së ushtrisë siriane në Halep, u bë e qartë se bisedimet e paqes në Gjenevë nuk do të shkonin siç duhej.
Konfirmimi për këtë ka ardhur nga i dërguari i posaçëm i OKB-së për Sirinë, Staffan de Mistura, i cili deklaroi të mërkurën një “pauzë të përkohshme” të këtyre bisedimeve, deri më 25 shkurt.
“Ka akoma punë për të bërë,” u tha ai gazetarëve në Gjenevë. “Prandaj kam marrë vendimin për një pauzë të përkohshme. Nuk është fundi apo dështimi i bisedimeve,” ka deklaruar ai.
Ndërkohë, pak pas njoftimit të të dërguarit të OKB-së, opozita siriane bëri të ditur se nuk do të kthehet në Gjenevë nëse nuk përmbushen kushtet humanitare.
Opozita ka kërkuar ndalim të bombardimeve të civilëve dhe lirim të mijëra të burgosurve, si dhe dërgimin e ndihmave për qytetet e rrethuara.
Ushtria siriane, e mbështetur nga avionët luftarakë rusë, po vijon një ofensivë në Halep. “Forcat e regjimit kanë bërë për tre ditë në Halep atë që nuk e kanë bërë për tre vjet, falë më së shumë mbështetjes ruse,” ka thënë Rami Abdel Rahman i Observatorit Sirian për të Drejtat e Njeriut. /tesheshi.com/
