Nga Mensur Krasniqi
Që nga dita kur LSDM, si parti e dytë për nga numri i deputetëve në Maqedoni ia dorëzoi letrën në formë të shkruar si garanci për pranimin e Platformës së Përbashkët të partive shqiptare BDI-së, kjo e fundit ka realizuar një sërë takimesh me Aleancën për Shqiptarët, gjegjësisht kreun e saj Ziadin Selën.
Ashtu siç thonë nga BDI dhe Aleanca, gjatë këtyre takimeve është diskutuar arsyeshmëria e dhënies së nënshkrimeve LSDM-së nga ana e deputetëve shqiptarë, si kusht që lideri i saj, Zoran Zaev ta marrë mandatin nga presidenti i shtetit për formimin e qeverisë.
Por ajo bie në sy në këtë rast është fakti që BDI në këto takime ka anashkaluar partinë më të madhe opozitare, e cila gjithashtu është nënshkruese e Platformës së Përbashkët, Lëvizjen BESA.
Por nga kjo e fundit nuk shqetësohen shumë për këtë lojë politike të Ali Ahmetit. E kanë të qartë që ky i fundit po përpiqet ta përvetësojë Platformën e nënshkruar në zyrën e Ramës në Tiranë. Por fakti se nuk e kanë pushtetin si qëllim në vetvete, i bën ata të jenë të ftohtë ndaj veprimeve të lidershipit të BDI-së.
Zëdhënësi i BESËS, Orhan Murtezani, i tha tesheshi.com se nuk shqetësohen aspak nga takimi i BDI-së me Aleancën për Shqiptarët. Nga kjo forcë politike vlerësojnë se ata vetë nuk ka nevojë të takohen me asnjërën nga partitë e lartëpërmendura, por e mbështesin fuqishëm Deklaratën e Përbashkët të partive shqiptare, pavarësisht faktit nëse do jenë pjesë e qeverisë ose jo.
“Takimet e partive tjera janë çështje e tyre. Si Lëvizje BESA jemi të mendimit se nuk ka nevojë të takohemi, sidomos tani që e kemi mbështetur Deklaratën e Përbashkët të partive politike shqiptare dhe zotohemi se do qëndrojmë bësnikë pikave të asaj deklarate qofshim në pozitë ose në opozitë”, tha Murtezani.
Nga ana tjetër, opinionisti Mersim Maksuti thotë se qasja e BDI-së ndaj Platformës dhe anashkalimin që ia bën vetëm njërit subjekt politik, BESËS pra, në zhvillimin e këtyre bisedimeve, nuk është parimore dhe as në funksion dhe vijën kombëtare si kriter parësor që kërkon vetë fryma dhe përmbajtja e Platformës së Përbashkët. Pra, sipas tij BDI dëshiron të përvetësojë këtë Platformë, megjithëse sipas tij më së shumti ajo është meritë e Lëvizjes BESA.
“Qëllimi i BDI-së duket haptas se dëshiron që platformën politike si dhe arritjet eventuale rreth avansimit të të drejtave të shqiptarëve me rastin e formimit të qeverisë, t’i kapitalizojë si fitore dhe triumf i saj, gjë që e vërteta është krejt ndryshe. Kjo është meritë dhe arritje e partive opozitare, në radhë të parë subjektit politik BESA, si forca udhëheqëse opozitare e këtij vendi”, shprehet Maksuti.
Dhe në fakt, ka qenë realiteti i ri politik i diktuar nga BESA si fenomen që e detyroi BDI-në të ndryshojë qëndrim e të tentojë të shfaqet para shqiptarëve si parti e kauzave të tyre nacionale. Ali Ahmeti po përpiqet tashmë që të gjejë hapësirat për t’u rehabilituar pas vitesh në qeverisje me VMRO-në ku të drejtat e shqiptarëve morrën një goditje të rëndë nga fryma nacionaliste e Gruevksit. Por dalja e BESËS e prishi tërësisht këtë statukuo. /tesheshi.com/
