Ministri i Jashtëm rus Sergei Lavrov ndodhet për një vizitë zyrtare në Turqi, ku u takua me ministrin e Jashtëm të vendit, Mevlut Çavusoglu, ku temë kryesore është kriza e grurit, tonelata të të cilit janë bllokuar në portet ukrainase dhe s’mund të takojnë nga Deti i Zi, ku rolin kryesor aty e ka Turqia me Bosforin e saj.
Pas takimit, Çavusoglu u tha gazetarëve se kishte bisedime të mira me Lavrovin për eksportet e drithit nga Ukraina, duke shtuar se ai besonte se ato duhet së bashku të hapnin rrugën për eksportet e produkteve nga Rusia dhe Ukraina të eksportuara në botë.
“Plani i OKB-së për të hapur një korridor për të rifilluar eksportet e grurit nga Ukraina është i arritshëm, por propozimi kërkon më shumë bisedime me të gjitha palët për të siguruar që anijet të jenë të sigurta,” tha Çavusoglu.
Lavrov shprehu shpresën se problemet që lidhen me transportin e grurit nga portet në Ukrainë mund të zgjidhen, me kusht që Kievi të çminojë ujërat përreth tyre.
“Nëse pala ukrainase është e gatshme të pastrojë minat për korridorin përmes Detit të Zi, Rusia është gjithashtu e gatshme”, tha Lavrov,.
“Ne jemi gati për të gjitha aktivitetet që synojnë sigurimin e anijeve që lundrojnë nga portet e Ukrainës. Ne jemi të gatshëm ta diskutojmë këtë edhe me bashkëbiseduesit tanë turq”, shtoi ai.
Ai tha gjithashtu se “operacioni special ushtarak” i Rusisë në Ukrainë po shkon sipas planit.
“Publiku i di shumë mirë qëllimet e operacioneve tona ushtarake dhe ne do t’i arrijmë ato qëllime”, tha ai.
Ai shtoi se bisedimet e paqes do të duhet të vazhdojnë përpara çdo samiti të mundshëm midis presidentit rus Vladimir Putin dhe presidentit ukrainas Vladimir Zelensky. /tesheshi.com/
