Një raund i ri bisedimesh për konfliktin sirian nis sot në Gjenevë nën kujdesin e OKB-së. Ndryshe nga bisedimet e vitit të shkuar, kur palët në konflikt nuk u ulën asnjëherë përballë, duke ia lënë ndërmjetësimin të dërguarit të OKB-së, opozita siriane ka kërkuar negociata të drejtpërdrejta me përfaqësuesit e regjimit.
“Ne kërkojmë negociata të drejtpërdrejta. Në vend të negociimit në dhoma [të ndara], kjo do të kursente kohë dhe do të qe provë e seriozitetit,” mësohet t’i ketë thënë agjencisë së lajmeve AFP zëdhënësi i Komitetit të Lartë të Negociatave, Salem al-Meslet.
Zëdhënësi u shpreh se nuk dëshironte që ky raund i ri bisedimesh të qe i pafrytshëm, ashtu si ato të një viti më parë.
Megjithatë, nuk ka shumë pritshmëri që nga negociatat që nisin sot të ketë një përparim të dukshëm, siç ka pohuar dhe i dërguari i OKB-së për Sirinë, Staffan de Mistura.
Bisedimet e sotme janë të parat të ndërmjetësuara nga OKB-ja në thuajse një vit; bisedime të ngjashme ka patur në Astana, të ndërmjetësuara nga Rusia dhe Turqia, si vende që ndërmjetësuan dhe në arritjen e armëpushimit në fuqi në Siri. /tesheshi.com/
