Një raund i ri bisedimesh diplomatike mbi Sirinë nis sot në Lozanë, që do të bëjë bashkë sekretarin amerikan të Shtetit, John Kerry, dhe ministrin e jashtëm rus, Sergei Lavrov.
Bashkë me ta do të jenë dhe kryediplomatët e vendeve kyçe në rajon, në një përpjekje për të gjetur një rrugëdalje për konfliktin sirian. Veç Kerry-t dhe Lavrov-it, të pranishëm në bisedime do të jenë Staffan de Mistura, i dërguari i posaçëm i OKB-së në Siri, si dhe përfaqësuesit e Turqisë, Arabisë Saudite, Katarit e Iranit.
Këto bisedime do të zhvillohen mes tensioneve të mëdha midis palëve të përfshira në një mënyrë a në një tjetër në konflikt, e ndërsa Halepi vazhdon të bombardohet. Ato janë të parat që prej ndërprerjes së negociatave mes SHBA-së dhe Rusisë për përtëritjen e një armëpushimi.
AFP-ja citon një zyrtar të lartë amerikan të thotë se bisedimet kanë si qëllim të shqyrtojnë idetë për t’i dhënë fund konfliktit, e jo një ndërprerje të menjëhershme të tij.
Të zymtë e ka bërë atmosferën para bisedimeve dhe deklarata e Lavrov-it, që tha të premten në Moskë, “Nuk kam ndonjë pritshmëri të veçantë.”
Lavrov e ka bërë të qartë se Rusia nuk planifikon të paraqesë iniciativa të reja për rrugët e zgjidhjes së konfliktit. /tesheshi.com/
