Ministria e Jashtme e Kinës ka bërë me dije se ka parashtruar një notë ankese ndaj SHBA-ve, pasi Presidenti i zgjedhur, Donald Trump zhvilloi një bisedë telefonike me liderin e Tajvanit. Kina e shikon Tajvanin si një provincë separatiste dhe vetë SHBA-ja vendosi në vitin 1979 të zbatonte politikën e ndërprerjes të të gjitha marrëdhënieve me Tajvanin.
Megjithatë, në telefonatën e tij me liderin e Tajvanit, Tsai Ing-wen, Trump u shpreh se do të vendoste marrëdhënie të mira “ekonomike, politike dhe për çështjet e sigurisë”. Vetë ministri i jashtëm i Kinës e cilësoi këtë bisedë si një lëvizje dinake të Trump.
Korrespondentja e BBC-së në Pekin thotë se lëvizja e Presidentit të zgjedhur për të anashkaluar protokollin 40-vjeçar të Shteteve të Bashkuara, që i ndalon një Presidenti apo një Presidenti të zgjedhur që të flasë drejtpërdrejtë me Presidentin e Tajvanit, me gjasa do të shkaktojë reagime të forta në Kinë.
Trump iu përgjigj menjëherë kritikave të Kinës përmes një shkrimi të shkurtër në Tëitter, ku thoshte: “Për t’u habitur sesi Shtetet e Bashkuara i shesin Tajvanit çdo vit miliarda dollarë armatime ushtarake dhe unë nuk duhet të pranoj një telefonatë urimi”.
Nga ana tjetër, Shtëpia e Bardhë ka bërë me dije se biseda e Trump nuk është ndonjë sinjal i mundshëm i ndryshimit të politikës së Shtetve të Bashkuara. Mediat amerikane raportojnë se Shtëpia e Bardhë ka mësuar në lidhje me këtë telefonatë vetëm pasi ajo bisedë është zhvilluar./tesheshi.com/
