Biseda e nxehtë 62-minutëshe, mesazhi i Biden për Putin

Presidenti rus Vladimir Putin dhe homologu i tij amerikan Joe Biden biseduan për pak më shumë se një orë për situatën rreth Ukrainës.

Në bisedën, e cila sipas mediave amerikane ka zgjatur 62 minuta, Biden ka paralajmëruar pasoja të rënda nëse Rusia pushton ish-vendin sovjetik.

Një deklaratë e Shtëpisë së Bardhë tha se Biden ishte i qartë se Shtetet e Bashkuara dhe aleatët e saj do të përgjigjeshin me vendosmëri nëse Rusia vendos të pushtonte Ukraninën dhe se kjo do t’i kushtonte shumë Rusisë.

Presidenti amerikan nënvizoi se çdo përpjekje e pushtimit rus të Ukrainës do të sjellë vuajtje të rënda për racën njerëzore dhe do të zvogëlojë pozicionin e Rusisë.

Sipas Shtëpisë së Bardhë, Biden ia bëri të qartë Putinit se, megjithëse Shtetet e Bashkuara janë të gatshme të zgjidhin gjithçka në rrugë diplomatike, në bashkëpunim me aleatët e saj, ato janë të gatshme për skenarë të tjerë.

Pritet ende një deklaratë nga Kremlini.

Kujtojmë, të dy presidentët kanë biseduar më parë në dhjetor, pasuar nga përpjekjet diplomatike për javë të tëra për të zgjidhur situatën në mënyrë diplomatike. Kjo rezultoi me takime të shumta mes kreut të diplomacisë ruse dhe kolegëve të tij evropianë, por edhe takime të liderëve botërorë me Putinin dhe Biden.

Ditët e fundit, situata është përkeqësuar më tej, prandaj më shumë se dhjetë vende kanë urdhëruar ose apeluar për tërheqjen e diplomatëve dhe qytetarëve të tyre nga Ukraina. /tesheshi.com/