Astrit Patozi, ish-nr. 2 i PD-së, më vonë themelues i Bindjes Demokratike, tashmë jashtë saj prej katër vitesh, parashikoi ndarjen e kësaj force e madje e mbështeti si zgjidhje. “Partia Demokratike duhet patjetër që të pranojë realitetin dhe të ndahet në dy pjesë”, tha Patozi në A2 CNN.
Këtë qëndrim, ai e argumentoi si vijon:
“Mendoj se Partia Demokratike ka për të shpëtuar nga ndarja e saj dhe nuk duhet ta marrë si gjë dramatike këtë ndarje. Por, kam frikë se PD-ja do të refuzojë të ndahet dhe do të vazhdojë të zvarritet. Gjysma e PD-së që do të mblidhet për të mbajtur Kuvendin nuk do të legjitimohet nga pjesa tjetër, nga ajo që ka ‘vulën’, nga partia zyrtare. Kjo zvarritje, sa më shumë të zgjasë, aq më keq do të jetë për PD-në. Kjo do të jetë në dëm të Foltores dhe do të përfitojnë në fund te vulëmbajtësit e partisë”.
Sipas Patozit, ndarja e PD-së duhet pranuar si realitet.
“Partia Demokratike duhet patjetër që të pranojë realitetin dhe të ndahet në dy pjesë, të cilat nuk bashkëjetojnë dot më. Ata që nuk do ta pranojnë këtë gjë, besoj se do të jenë njerëzit e Foltores, që nuk do ta pranojnë dot faktin se do të jenë në një sigël tjetër. Duhet ta pranojnë këtë sepse nuk është fundi i botës”, argumentoi ai. /tesheshi.com/
