Princi i Kurorës i Arabisë Saudite Mohammed bin Salman tha se autoritetet e vendit duan të ndërtojnë marrëdhënie të mira dhe të veçanta me Iranin.
“Irani është një vend fqinj dhe ne duam të kemi marrëdhënie të veçanta. Ne duam prosperitet në Iran dhe të ndjekim interesa të përbashkëta”, tha ai në një intervistë me televizionin shtetëror saudit.
Bin Salman fajësoi drejtpërdrejt Teheranin zyrtar dhe tendencat e tij për zhvillimin e një programi bërthamor dhe balistik, si dhe mbështetjen për grupet e armatosura në vendet fqinje, për problemet aktuale në marrëdhëniet midis Arabisë Saudite dhe Iranit.
“Ne jemi duke punuar me partnerë për të eleminuar këto probleme. Qëllimi ynë është të zgjidhim problemet dhe të kemi marrëdhënie të mira me të gjithë,” tha princi saudit.
Duke komentuar situatën në Jemenin e shkatërruar nga lufta, trashëgimtari i fronit tha se autoritetet saudite nuk mund të pranojnë praninë e paligjshme dhe aktivitetet e lëvizjes rebele Huthi pro-iraniane në kufirin Jemen-Saudi.
“Shpresojmë që lëvizja Huthi do të ulet gjithashtu në tryezën e negociatave dhe do të përpiqet të arrijë një zgjidhje me të gjitha palët përkatëse që do të respektojnë interesat e vendeve fqinje,” tha ai.
I pyetur nëse Shtetet e Bashkuara i kishin kthyer shpinën Arabisë Saudite, Bin Salman tha se Riadi zyrtar në 90 për qind të rasteve ishte dakord me administratën e Presidentit të SHBA Joe Biden, por që përqindja e mosmarrëveshjeve mund të rritet ose zvogëlohet herë pas here.
I pyetur nëse Shtetet e Bashkuara po ushtrojnë presion në Riad, Bin Salman tha se Arabia Saudite refuzon ndërhyrjen e huaj në punët e brendshme. /tesheshi.com/
