Një dyndje e fuqishme reporterësh dhe grupesh xhirimi nga vendet e perëndimit janë nisur për në Kapshticë ku pritet nga ora në orë të vijnë një numër refugjatësh nga Siria.
Siç ndodhi në 1999 kur Kukësi u pushtua nga trupat më të mëdha televizive të botës, edhe këtë herë siç duket Shqipëria do të jetë në lajmet e para.
Nikolo Zancan, reporter senior i së përditshmes italiane La Stampa, i konfirmoi tesheshi.com se një numër reporterësh nga media prestigjoze europiane janë nisur të hënën në mëngjes me avionin e Alitalia-s të linjës Romë-Rinas.
Ata kanë mbërritur një orë para mesditës dhe menjëherë kanë udhëtuar për në Bilisht ku kanë prenotuar hotelet dhe kanë marrë me qera postacionet për të instaluar furgonët portativë të transmetimit.
Një ekip i BBC-së ka lëvizur nga Kosturi drejt Kapshticës, ku ka zënë vend dhe në hotelin më të mirë të pikës kufitare.
Dy ditë më parë, qendra koordinuese e Bashkimit Europian për Refugjatët i ka sinjalizuar autoritetet shqiptare se refugjatët nga Siria pritet të hyjnë së shpejti në Shqipëri.
Sipas planit të miratuar në Samitin e Vjenës, Shqipëria i ka bërë gati qendrat e pritjes, megjithëse ekziston frika se mund të vijnë më shumë refugjatë nga ç’është planifikuar.
Në Greqi gjenden aktualisht një numër i madh refugjatësh, ndërkohë që Maqedonia, në bashkëpunim me Serbinë i ka mbyllur kufijtë, për të mos pranuar më, ose, e pakta, për ta kontrolluar fluksin e tyre.
Siç raportohet, sinjalizimet për hyrjen e refugjatëve sirianë në vendin tonë kanë sjellë shtimin e masave të kontrollit në kufirin me Greqinë.
Pikërisht, në pikën e kalimit kufitar të Kapshticës, në vijën e gjelbër, janë vendosur tre patrulla kontrolli, të pajisura edhe me kamera nate. Ndërkohë që një tjetër patrullë është vendosur në fshatin Sul të rrethit të Devollit, një prej pikave më kyçe sa u takon kalimeve klandestine të kufirit me Greqinë.
Edhe dy patrulla të tjera të policisë rrugore janë të vendosura përgjatë aksit nacional Korçë-Kapshticë.
Përgatiti: Ylli Pata – /tesheshi.com/
