Jugu i Japonisë është goditur në dy ditët e kaluara nga dy tërmete të fuqishme. Pas të parit, prej 6.4 ballësh, e që u mori jetën nëntë personave, ka pasuar një i dytë brenda 24 orëve, me magnitudë 7.3 ballë.
Më së paku 19 është numri i viktimave, ndërsa numri i të lënduarve është mbi 1.500, në rajonin Kyushu.
Rrugë të shkatërruara, ndërtesa të rrënuara e rrëshqitje toke. Këto janë ato çka raportohen për një zonë të gjerë, teksa energjia mungon në mbi 200.000 shtëpi.
Zëdhënësi i qeverisë japoneze njoftoi për dislokimin e 20.000 trupave ushtarake në rajonin e goditur nga tërmeti për operacionet e shpëtimit. Zjarrfikës e forca policore të shumta janë drejtuar po ashtu për në rajonin jugperëndimor të vendit.
Tërmeti i dytë, në thellësi 10 kilometra pranë qytetit Kumamoto, ishte shumë më i fuqishëm se i pari, dhe goditi një zonë më të gjerë.
Mijëra njerëz e kanë kaluar natën jashtë, në rrugë. Shumë të tjerë mendohet të gjenden nën rrënoja, duke përfshirë më së paku 60 persona në një azil pleqsh. /tesheshi.com/
