Këshilli i Rregullores për Parlamentin është mbledhur ditën e sotme për të diskutuar mandatin e deputetes së Partisë Socialiste në qytetin e Vlorës, Valentina Leskaj, pas një kërkese të Partisë Demokratike.
Në kërkesën e Partisë Demokratike thuhet se djemtë e Leskajt kanë përfituar nga fondet publike, e për rrjedhojë deputetja duhet të lejë mandatin, argument ky që u përsërit disa herë gjatë mbledhjes si dhe në përfundim të saj nga deputeti demokrat Arben Ristani.
Në mbrojtje të deputetes, avokati i saj u shpreh se pretendimet nuk qëndrojnë dhe se nuk është shkelur ligji i parandalimit të konfliktit të interesit të zyrtarëve të lartë.
Në mbledhjen e drejtuar nga kreu i Kuvendit, Ilir Meta, shumica votoi kundër kërkesës së Partisë Demokratike për ndërprerjen e mandatit të zonjës Leskaj.
“Të afër të pushtetarëve marrin pasuri publike. Çështja do të diskutohet në seancën parlamentare”,- tha Arben Ristani në një prononcim për mediat, pas përfundimit të mbledhjes./tesheshi.com/
