Një helikopter ushtarak pakistanez me një grup ambasadorësh diplomatikë në bord është rrëzuar mbi një shkollë në veri të vendit. Si pasojë, kanë ndërruar jetë ambasadori norvegjez Leif H. Larsen dhe ambasadori i Filipineve, D. Lucenario Jr.
Gjatë këtij rrëzimi kanë ndërruar jetë edhe bashkëshortet e ambasadorit të Malajzisë dhe Indonezisë, bashkë me pilotët. Ngjarja ka ndodhur në zonën e Naltraitm në provincën Gilgit-Baltistan, ku si pasojë janë plagosur ambasadori polak dhe ai holandez.
Në bordin e MI-17, i cili ka dalë jashtë kontrollit gjatë uljes dhe më pas ka marrë flakë, ndodhej një delegacion me ambasadorë, diplomatë e gazetarë, mes tyre 11 të huaj dhe 6 pakistanezë.
Grupi i helikopterëve (3 gjithsej) ishte drejtuar për në rajonin e Gilgit për të prezantuar dy projekte bashkëpunimi.
Kryeministri Nawaz Sharif, i cili udhëtonte në një helikopter tjetër është ulur në Islamabad. Talebanët e Tehrek-e-Taliban Pakistan (TTP) kanë marrë përsipër sot përgjegjësinë e incidentit./tesheshi.com/
