Përsëritja e votimit të Tearce të Tetovës nuk e ka ndryshuar dot rezultatin e mandateve. Pra, VMRO mbetet me 51, ndërsa LSDM me 49. Që kjo e fundit t’ia rrëmbente partisë së Gruevskit një mandat, do duhej që të kishte një diferencë prej 307 votash, gjë që nuk e arriti dot.
Rezultati përfundimtar është: 245 vota për LSDM-në, 150 për VMRO-DPMNE, 1 votë BDI-së, 1 PDSH-së, 1 e ka marrë dhe Aleanca për Shqiptarët, ndërsa 1 fletëvotim ka dalë i pavlefshëm. Rezultate këto që nuk janë gjithsesi zyrtare, por jo të pakonfirmuara në rrugë alternative
Vendvotimi 2011 në Tearcë kishte gjithsej 714 votues, nga të cilët për dallim prej zgjedhjeve të 11 dhjetorit ku dolën 404 votues, kësaj rradhe dalja ishte me 2 vota më e vogël, gjegjësisht 402 votues.
Ndërkohë, ajo që habit nga rezultatet përfundimtare në këtë vendvotimi, është fakti se si VMRO arriti të sigurojë 150 vota, ndërsa para dy javësh mori vetëm 91 sosh.
Pra, parashtrohet pyetja nëse ndonjëra nga partitë politike shqiptare për çështje strategjike të formimit të qeverisë ka arritur marrëveshje të fshehtë me kreun e VMRO-së, Nikolla Gruevskin, për t’ia, kaluar atij një pjesë të votave nga elektorati?
Gjasat janë që po. Ndryshe, nuk ka asnjë motiv që shqiptarët të votojnë Gruevskin “pa urdhër nga lart”, kur dihet që retorika e tij nacionaliste është ekstremisht përjashtuesë për elementin shqiptar në Maqedoni.
Dhe nëse ka patur ndonjë simpati shqiptare për të – përjashtur Ali Ahmetin, i cili ndan pushtet dhe padyshim interesa me të – ajo nuk ka se si të ketë rritje, dhe kjo vetëm në dy javë dhe pa asnjë arsye racionale. Për më tepër, Gruevski as që morri mundimin të shkelë aty këto dy javë. /tesheshi.com/
