Bie dhe Gledis Nano

Ka rënë së fundi dhe Gledis Nano, ndër ata drejtorë të përgjithshëm Policie nën qeverisjen Rama që më shumti përcolli shpresë e besim se do godiste krimin, apo se do kishte sukses në një reformim të Policisë së Shtetit, deri më tani ndër sektorët më problematikë, sa për paaftësi e sa për korruptim.

Nano u shkarkua nga posti i lartë i Drejtorit të Policisë së Shtetit, madje me motivacionin e moskryerjes siç duhet të detyrës. Në raste të ngjashme kjo nuk është thënë; madje ikjet apo largimet kanë qenë me komplimeta nga pas.

“Sot, qeveria mori vendim për shkarkimin e drejtorit të Përgjithshëm të Policisë, shkarkim i cili lidhet me mospërmbushje të objektivave që kishim vënë në lidhje me drejtorin e Përgjithshëm të Policisë. Kjo lidhet me situatën e krijuar në muajt e fundit, situatë që kërkon reagim më të fortë dhe menaxhim më efikas të Policisë së Shtetit.

Për momentin, detyrat do t’i ushtrojë nëndrejtori i Përgjithshëm i Policisë(Tonin Vocaj) dhe shumë shpejt do ju lajmërojmë edhe për edhe për emërimin e drejtorit të ri të Policisë së Shtetit”, u shpreh Bledi Çuçi, ministër i Brendshëm.

Kujtojmë që Gledis Nano erdhi në krye të Policisë së Shteti, pasi u bë i njohur për disa aksione anti-terror, sidomos në Siri, duke mundësuar daljen prej kampeve të disa prej familjarëve shqiptarë të mbetur aty.

E nisi punën në krye të Policisë së Shtetit me një test të diskutueshëm droge në radhët e uniformave blu, por e përfundoi me ngjarje të rënda që treguan pafuqinë për “bërë histori” në krye të Policisë së Shtetit. /tesheshi.com/