Zv/presidenti i SHBA-së, Joe Biden, deklaroi nga Kroacia se gjashtë vendet e Ballkanit Perëndimor duhet të futen menjëherë në BE.
Biden tha në një konferencë për shtyp se një integrim i tillë i rajonit, si një i tërë, do të ishte garancia më e madhe për stabilitetin e tij, por edhe qëndrueshmërinë e të gjithë Europës.
“E presim me padurim një gjë të tillë, sepse një Europë e plotë, e lirë dhe në paqe ka qënë ëndrra e brezit të cilit i përkas dhe ëndrra e gjeneratës së tim eti. Ashtu siç e shoh unë, por edhe siç është këndvështrimi me realist në këtë rast, stabilitet nuk mund të ketë pa një integrim të plotë në Europë në pjesën juglindore të saj apo rajonit të Ballkanit”, tha Biden.
“Në takim u diskutua sesa shumë po i tkurr rezervat e vendeve të rajonit kriza e emigrantëve. Do ketë një mbledhje tjetër të liderëve të BE-së këtë të dielë, por ndërkohë dimë se këta njerëz kanë nevojë urgjente për ushqim, strehim, veshje të ngrohta tani që afron dimri, dhe këto nevoja të tyre vetëm sa do të shtohen. Kjo është një tjetër sfidë që kërkon angazhimin e të gjithëve. Të gjithë ne duhet të bëjmë më shumë”, vijoi Biden. /tesheshi.com/
