Në një bisedë telefonike, Joe Biden e uroi Benjamin Netanyahun për “fitoren e partisë së tij” në zgjedhjet parlamentare “të lira dhe të ndershme” në Izrael, tha zëdhënësja e presidentit amerikan, Karine Jean-Pierre.
Në atë bisedë, Biden “theksoi mbështetjen e fortë për sigurinë e Izraelit”, shtoi ajo në konferencën e përditshme për shtyp, duke vënë në dukje se Shtëpia e Bardhë “do të monitorojë nga afër procesin e formimit të qeverisë”.
Netanyahu fitoi zgjedhjet javën e kaluar, kur blloku i tij fetar i krahut të djathtë siguroi 64 nga 120 vendet në parlament pasi u numëruan të gjitha votat.
Likud, partia e ish-kryeministrit 73-vjeçar, do të jetë partia më e madhe në Knesset të Izraelit me 32 vende, nga 24 vende të fituara nga partia izraelite Yesh Atid (Ka një të ardhme) e kryeministrit në largim Yair Lapid. raportuan mediat.
Zgjedhjet e së martës ishin të pestat në tre vjet e gjysmë dhe u thirrën pasi koalicioni qeverisës me tetë parti u shemb në qershor, duke humbur shumicën e tij parlamentare pas vetëm 12 muajsh. Pjesëmarrja ishte relativisht e lartë, 71.3 për qind.
Presidenti Isaac Herzog ka afat deri më 16 nëntor për të zgjedhur një kandidat për të formuar një qeveri të re. Kandidati do të ketë më pas 28 ditë për të formuar një koalicion, me një shtyrje të mundshme prej 14 ditësh. /tesheshi.com/
