Presidenti i zgjedhur amerikan Joe Biden i bëri thirrje Presidentit në largim Donald Trump të nënshkruajë një ligj për të ndihmuar të rrezikuarit nga pandemia, duke vlerësuar se çdo vonesë e mëtejshme do të kishte “pasoja katastrofike”.
“Një ditë pas Krishtlindjes, miliona familje nuk e dinë nëse do të jenë në gjendje të kenë bukën e gojës për shkak të refuzimit të Presidentit Trump për të nënshkruar ligjin për ndihmën ekonomike të miratuar në Kongres me një shumicë të madhe,” tha Biden në një deklaratë.
Sipas CNN, ky mohim mund të ketë pasoja katastrofike.
“Ne po shpresojmë për vaksina, por na duhen fonde për t’i shpërndarë ato dhe për t’ua dhënë miliona amerikanëve, përfshirë punonjësit e linjës së parë shëndetësore. Ky ligj është i një rëndësie thelbësore dhe duhet të hyjë në fuqi tani,” përfundoi Biden.
Megjithëse Kongresi miratoi një paketë ndihme prej 900 miliardë dollarësh për ata që preken gjatë pandemisë, miliona amerikanë mund të humbin të ardhurat e tyre menjëherë pas pushimeve nëse Trump nuk nënshkruan ligjin. /tesheshi.com/
