Presidenti amerikan Joe Biden e etiketoi paraardhësin e tij Donald Trump dhe mbështetësit e tij republikanë si ekstremistë që janë një kërcënim për Kushtetutën e SHBA.
Presidenti amerikan Joe Biden e etiketoi paraardhësin e tij Donald Trump dhe mbështetësit e tij republikanë si ekstremistë që janë një kërcënim për Kushtetutën dhe që synojnë, siç tha ai, të shkatërrojnë demokracinë amerikane.
“Ka rreziqe që ne nuk mund t’i lejojmë të mbizotërojnë,” tha Biden, duke akuzuar Trump dhe mbështetësit e tij se po përpiqen të përdorin dhunën për të sulmuar institucionet demokratike.
“Kombi është në një pikë kthese dhe amerikanët duhet të reagojnë. Republikanët MAGA (shkurtim i sloganit të fushatës së ish-presidentit amerikan Donald Trump ‘Make America Great Again’) kërkojnë të përmbysin sistemin aktual.
Nuk është e mundur të mbështesësh rebelimin dhe të jesh pro-amerikan. Ndaloni sulmin ndaj demokracisë amerikane”, tha Biden, duke e krahasuar Trump-in me autokratë në histori, të cilët, që siç tha ai, minuan demokracitë, raporton Zëri i Amerikës.
“E vërteta e dhimbshme”
Ai gjithashtu deklaroi se shumë republikanë nuk e mbështesin Trump-in, por se Partia Republikane është “e dominuar, e udhëhequr dhe e frikësuar nga Donald Trump dhe republikanët MAGA”.
“Dua të jem shumë i qartë: jo çdo republikan është një republikan MAGA. Jo çdo republikan e pranon ideologjinë e tyre ekstreme. Unë e di këtë sepse kam pasur mundësinë të punoj me ta. Besoj se është detyra ime t’ju them të vërtetën sado e vështirë dhe e dhimbshme të jetë. Për mendimin tim, do të them atë që është e vërtetë: Republikanët MAGA nuk respektojnë Kushtetutën, nuk besojnë në shtetin e së drejtës. Ata nuk e njohin vullnetin e popullit dhe refuzuan të njohin rezultatet e zgjedhjeve të lira”, tha ndër të tjera Biden gjatë një fjalimi në Filadelfia para Dhomës së Pavarësisë.
Presidenti amerikan theksoi se do të “luftojë për demokraci deri në frymën e tij të fundit” dhe u bëri thirrje qytetarëve amerikanë që t’i bashkohen dhe të votojnë në zgjedhjet e ardhshme.
Biden iu drejtua publikut në një kohë kur zgjedhjet e nëntorit në gjysmë të mandatit të tij po afrojnë dhe në rrethana të polarizimit të madh politik të shoqërisë amerikane, sipas Zërit të Amerikës. /tesheshi.com/
