Demokracia amerikane është nën sulm, vuri në dukje Presidenti Joe Biden në fjalimin e tij për mbrojtjen e demokracisë, të cilin e mbajti në Stacionin Union në Uashington, jo shumë larg Capitol Hill.
“Demokracia amerikane është nën sulm, sepse ish-presidenti i mundur i Shteteve të Bashkuara refuzoi të pranonte rezultatet e zgjedhjeve të vitit 2020”, tha Biden.
“Ai nuk pranon vullnetin e popullit, nuk pranon faktin që humbi. Ai shpërdoroi pushtetin dhe vuri besnikërinë ndaj vetes para besnikërisë ndaj Kushtetutës”, shtoi ai. Presidenti, duke folur në një ngjarje të Komitetit Kombëtar Demokratik në Stacionin Union pranë Capitol-it, paralajmëroi se vendi përballet me një udhëkryq në zgjedhjet e javës së ardhshme që mund të shkundë demokracinë.
Ai theksoi se kërcënimet e disa kandidatëve republikanë për të refuzuar të pranojnë rezultatet e zgjedhjeve të 8 nëntorit nëse humbasin, përfaqësojnë një kërcënim për demokracinë, duke fajësuar ish-presidentin Donald Trump se i ka frymëzuar ata.
“Mos bëni gabim. Demokracia është në fletën e votimit për të gjithë ne,” tha Biden në një fjalim vetëm disa ditë përpara se amerikanët të vendosin nëse demokratët do të mbajnë kontrollin e Senatit dhe Dhomës së Përfaqësuesve të SHBA ose do t’ua dorëzojnë pushtetin republikanëve.
Presidenti u bëri thirrje amerikanëve që jo vetëm të dekurajojnë dhe dënojnë dhunën politike, por edhe të refuzojnë frikësimin e votuesve në kutinë e votimit.
“Demokracia është e papërsosur. Gjithmonë ka qenë, por të gjithë jemi të thirrur ta mbrojmë atë tani,” vuri në dukje ai.
Fjalimi erdhi më pak se shtatë ditë pas një sulmi në shtëpinë e Kryetares së Dhomës Nancy Pelosi që plagosi bashkëshortin e saj, i cili ndodhej në shtëpi.
“Sulmuesi hyri në shtëpi duke pyetur: ‘Ku është Nancy? Ku është Nancy? Këto ishin të njëjtat fjalë të përdorura nga turma kur sulmuan Kapitol-in më 6 janar. Ne nuk i zgjidhim dallimet tona në Amerikë me trazira, turmë, plumba apo çekiç. Ne i zgjidhim në mënyrë paqësore në kutinë e votimit. Ka shumë në rrezik në këto zgjedhje afatmesme, por ka diçka tjetër në lojë: vetë demokracia”, tha Biden.
Ai u bëri thirrje votuesve që “të mendojnë gjatë dhe mirë për momentin në të cilin ndodhemi”. /tesheshi.com/
