Presidenti amerikan Joe Biden tha të enjten në Madrid se në ditët në vijim do të njoftojë se Shtetet e Bashkuara të Amerikës do t’i dërgojnë Ukrainës 800 milionë dollarë shtesë për armë dhe theksoi se Organizata e Traktatit të Atlantikut të Veriut (NATO) do të mbrojë “çdo centimetër” të territorit të saj.
“Sekretari amerikan i Mbrojtjes, Lloyd Austin mblodhi më shumë se 50 vende që bënë premtime të reja, dhe kjo është një përpjekje globale për të mbështetur Ukrainën: pothuajse 140 mijë sisteme antitank, më shumë se 600 tanke, pothuajse 500 sisteme artilerie, më shumë se 600 mijë njësi municioni, sistemet e avancuara të lëshimit të raketave, sistemet kundër anijeve dhe sistemet e mbrojtjes ajrore”, tha Biden.
“Ne do ta mbështesim Ukrainën për aq kohë sa të duhet”, tha Biden në një konferencë për shtyp pas përfundimit të samitit të NATO-s, të cilin ai e quajti historik. /tesheshi.com/
