Një samiti familjar në Camp David për Joe Biden. Pas dështimit të ububushëm në debatin televiziv në Atlanta përballë rivalit të tij republikan Donald Trump, presidenti amerikan dhe bashkëshortja e tij Jill u ribashkuan pjesën tjetër të familjes për të diskutuar të ardhmen e garës për një mandat tjetër shërbimi në Shtëpinë e Bardhë.
Sipas asaj që ka zbuluar televizioni amerikan NBC, që citon pesë persona me dijeni mbi këto bisedime, udhëtimi i Biden tek rezidenca presidenciale që ndodhet rrëzë maleve të shtetit Maryland, ishte planifikuar që përpara debatit të së enjtes së kaluar.
Pra që çifti presidencial do të bashkohej me fëmijët dhe nipërit e tyre pas aktiviteteve elektorale në Karolinën e Veriut dhe Nju Jork, ishte menduar paraprakisht. Megjithatë nisur nga zhvillimet e fundit, fundjava ishte një mundësi për të zhvilluar një takim sa më privat mes njerëzve më me ndikim në jetën e Joe Biden.
Familja Biden luajti një rol kyç në zgjedhjen e tij për të kandiduar në zgjedhjet e vitit 2020, dhe tani ajo mund ta ndihmojë atë që të marrë një nga vendimet më të vështira dhe komplekse të jetës së tij të gjatë politike.
Deri më tani, përfaqësuesit kryesorë të Partisë Demokratike kanë siguruar mbështetjen publike për rikandidimin e Joe Biden, duke filluar me mesazhet e ish-presidentëve Barack Obama dhe Bill Clinton. Por demokratët kryesorë në Kongres, përfshirë kongresmenin Hakeem Jeffries nga Nju Jorku, Jim Clyburn nga Karolina e Jugut dhe Nancy Pelosi nga Kalifornia, kanë shprehur privatisht shqetësime mbi gjendjen e tij fizike dhe mendore.
Kjo është konfirmuar nga dy burime të informuara për NBC, edhe pse publikisht të gjithë e mbështesin komandantin e përgjithshëm. Njëkohësisht, në mesin e anëtarëve kryesorë të partisë, ka një marrëveshje për faktin se vetëm pasi të jetë konsultuar me familjen e tij, Joe Biden mund të vendosë nëse do të vazhdojë apo do t’i japë fund fushatës.
“Ata që marrin vendimet janë dy persona:presidenti dhe gruaja e tij”– tha një nga burimet pranë diskutimeve. Ndërkohë një burim tjetër shtoi: “I vetmi person që ka më shumë ndikim tek ai është Zonja e Parë e SHBA-së. Nëse ajo vendos se duhet të ketë një ndryshim kursi, atëherë kjo gjë kjo do të ndodhë”.
Por deri më tani, që të dy janë treguar më shumë se të vendosur për të vazhduar përpara me garën. “Joe nuk është vetëm personi i duhur për këtë punë. Ai është i vetmi person për këtë punë!”– deklaroi gruaja e Biden gjatë një aktiviteti për mbledhjen e fondeve në Hamptons, një resort ekskluziv pushimesh në Long Island në Nju Jork.
Kjo deklaratë duket se përjashtojnë çdo hipotezë të braktisjes së garës për në Shtëpinë e Bardhë dhe daljes së kandidatëve alternativë nga Partia Demokratike. “Mendoj se tani duhet të largohem”– tha pak më vonë vetë Joe, duke bërë shaka me thirrjet nga media dhe analistë për t’u tërhequr.
“Sigurisht unë nuk pata një mbrëmje të mrekullueshme të enjten, por as Trump”– vazhdoi ai, përpara se të përmendte editorialin e bordit të New York Times që i sugjeroi të tërhiqej nga gara, por duke specifikuar se gazeta gjithashtu theksoi edhe sesi manjati republikan gënjeu gjatë gjithë debatit.
“Donald Trump është një kërcënim real për SHBA-në… Ai do të shkatërrojë demokracinë tonë. Ndërsa unë do ta mbroj atë”– tha sërish ai duke premtuar se “do t’i fitojmë këto zgjedhje”.
Presidenti Biden mori pjesë në një mbledhje të trefishtë fondesh të shtunën, duke u përpjekur të sigurojë donatorët e mëdhenj se ai mund të fitojë një mandat të dytë në nëntor.
Frika është se nëse sondazhet po tregojnë një rënie të konsiderueshme të mbështetjes (sipas projeksionit të fundit të televizionit CBS, 72 për qind e amerikanëve mendojnë se Biden nuk gëzon “shëndetin mendor dhe aftësitë njohëse të duhura” për t’u bërë president), ata mund të bëjnë një hap prapa.
CNN shpjegoi në një artikull sesi moria e mbështetësve të pasur të Bidenit është aktualisht e ndarë në tre linja:një fraksion pretendon se presioni ndaj Joe Biden për t’u tërhequr (kur ai duket i vendosur në dëshirën e tij për të vazhduar garën) do të ishte vetë-shkatërrues.
Ndërkohë një grupim tjetër, bën thirrje për një qasje të ndërmjetme, duke kërkuar nga udhëheqësit e Partisë Demokratike të marrin në konsideratë masat drastike, vetëm pasi të kenë një analizuar më me imtësi pasojat e paraqitjes negative të presidentit në debatin e enjtes mbrëma.
Megjithatë një grupim i tretë donatorësh dhe këshilltarësh, të cilët kanë më pak lidhje të drejtpërdrejta me rrethin e Biden, po u bëjnë thirrje demokratëve që të mos humbin kohë dhe të nisin menjëherë procesin e gjetjes së një kandidati të ri, duke qenë se zgjedhjet janë vetëm katër muaj larg.
