Presidenti amerikan Joe Biden deklaroi se, në përputhje me Ligjin Kombëtar të Emergjencave, dekreti për situatën emergjente në Ballkanin Perëndimor mbetet në fuqi.
“Aktet e dhunës ekstremiste dhe aktivitetit pengues, si dhe situata në Ballkanin Perëndimor, e cila pengon përparimin drejt qeverisjes efektive dhe demokratike dhe integrimit të plotë në institucionet transatlantike, të përcaktuara në këto urdhra ekzekutivë, vazhdojnë të përbëjnë një kërcënim të pazakontë dhe të jashtëzakonshëm për sigurinë kombëtare dhe politikën e jashtme të Shteteve të Bashkuara”, tha Biden në një mesazh drejtuar Kongresit, të publikuar në faqen e Shtëpisë së Bardhë.
Urdhëri Ekzekutiv
Ai theksoi se për këtë arsye është e nevojshme vazhdimi i gjendjes së jashtëzakonshme të shpallur me Urdhrin Ekzekutiv 13219 për Ballkanin Perëndimor.
Sipas një deklarate të publikuar në faqen e internetit të Shtëpisë së Bardhë, urdhri ekzekutiv fillimisht u nënshkrua më 26 qershor 2001.
Ai u ndryshua më pas me Urdhër Ekzekutiv të datës 28 maj 2003, i cili u zgjerua sipas Urdhrit Ekzekutiv 14033 dhe mbetet në fuqi pas datës 26 qershor 2023. /tesheshi.com/
