Presidenti i SHBA Joe Biden tha të premten se presidenti ukrainas Volodymyr Zelensky “nuk donte të dëgjonte” paralajmërimet e SHBA përpara pushtimit rus të vendit të tij.
“Shumë menduan se po ekzagjeroja kur fola për sulmin rus në Ukrainë, përpara se të fillonte,” tha Biden në një pritje në Los Anxhelos, ku po mblidheshin fondet për Partinë Demokratike.
“Por e dija që kishim informacion në lidhje me këtë. Thashë se Putini do të kalonte kufirin. Nuk kishte asnjë dyshim, por Zelensky nuk donte të dëgjonte,” u tha Biden gazetarëve.
Shtetet e Bashkuara filluan paralajmërimin për përgatitjet për një pushtim të Ukrainës shumë kohë përpara se presidenti rus të shpallte një “operacion special” më 24 shkurt, shkruan France Presse.
Këto paralajmërime provokuan mosbesim dhe madje kritika nga disa aleatë evropianë, të cilët në atë kohë mendonin se Shtetet e Bashkuara po ekzagjeronin.
Sot është dita e 108-të e pushtimit rus. Negociatat duken të largëta pasi situata në front është jashtëzakonisht e vështirë pasi agresori rus ka shënuar suksese ditët e fundit. /tesheshi.com/
