Presidenti i SHBA Joe Biden do të presë të enjten kancelaren gjermane Angela Merkel në Shtëpinë e Bardhë.
Zëdhënësi i Shtëpisë së Bardhë Jen Psaki tha se të dy udhëheqësit do të diskutojnë sulmet e piraterisë me softuer shantazhi që goditën firmat amerikane dhe tubacionin Nord Stream 2 që po ndërtohej nga Rusia në Gjermani.
Gazsjellësi Nord Stream lidh Rusinë dhe Gjermaninë përtej Detit Baltik, duke anashkaluar Ukrainën. Psaki tha se Biden ende e konsideron tubacionin një marrëveshje të keqe.
Merkel së shpejti do të përfundojë mandatin e saj të katërt si kancelare. Kjo do të jetë vizita e saj e parë në Uashington që kur Biden mori pushtetin.
Shtetet e Bashkuara dhe Gjermania kanë shprehur dëshirën e tyre për të kapërcyer mosmarrëveshjet rreth Nord Stream 2 dhe Rusisë në përgjithësi, këtë verë, pas mandatit konfliktual të ish-Presidentit Donald Trump.
Gjatë vizitës së tij të parë zyrtare në Gjermani, Sekretari i Shtetit i SHBA Antony Blinken shprehu besimin se të dy vendet do të vazhdojnë të veprojnë së bashku në lidhje me çdo lëvizje të rrezikshme ose provokuese nga Rusia.
Lidhur me tubacionin e gazit Nord Stream 2, Blinken shprehu kundërshtimin e SHBA ndaj projektit, por gjithashtu shprehu shpresën se ai do të gjente një zgjidhje kompromisi me Gjermaninë. Qëllimi është të arrihet një marrëveshje më së voni deri në gusht. /tesheshi.com/
