Presidenti i sapozgjedhur Donald Trump dhe presidenti Joe Biden, rivalë politikë prej kohësh, u takuan të mërkurën për herë të parë që kur Trump fitoi përsëri Shtëpinë e Bardhë javën e kaluar, me të dy duke premtuar një tranzicion të qetë të pushtetit në janar.
Biden mundi Trump në zgjedhjet e vitit 2020, por u largua nga gara e 2024 në korrik pas një debati katastrofik me Trump, një republikan. Ai i kaloi kandidaturën e tij nënpresidentes Kamala Harris, e cila gjithashtu humbi.
“Ne po presim, siç thamë, një tranzicion të qetë të pushtetit, ne do të bëjmë gjithçka që mundemi për t’u siguruar që të keni gjithçka që ju nevojitet,” tha Biden. “Mirë se erdhe, mirë se kthehesh.”
“Politika është e vështirë dhe në shumë raste nuk është një botë shumë e bukur, por është një botë e bukur sot, dhe unë vërtet vlerësoj që transferimi i pushtetit është kaq i qetë, e vlerësoj vërtet këtë, Joe”, tha Trump, i cili merr detyrën më 20 janar.
Ishte një kontrast i fortë me kritikat që dy burrat i kishin bërë njëri-tjetrit gjatë viteve. Ekipet e tyre marrin pozicione krejtësisht të ndryshme për çështjet që variojnë nga ndryshimet klimatike deri te Rusia dhe tregtia.
Biden, i cili është 81 vjeç, e portretizon Trumpin si një kërcënim për demokracinë, ndërsa Trump, i cili është 78 vjeç, e portretizon Bidenin si të paaftë. Trump bëri pretendime të rreme për mashtrim të gjerë zgjedhor pasi humbi zgjedhjet e 2020 nga Biden.
Kujtojmë se pas zgjedhjeve të fundit presidenciale në Amerikë, presidenti i atëhershëm Donald Trump refuzoi të respektonte procedurën dhe të priste në Shtëpinë e Bardhë presidentin e sapozgjedhur të atëhershëm Joe Biden. /tesheshi.com/
