Kandidati demokrat për president Joe Biden akuzoi rivalin Donald Trump për dështimin në mbështetje të protestave demokratike në Bjellorusi, një vend për të cilin ai tha se udhëhiqej nga një “diktator”.
Më shumë se 12,000 njerëz janë arrestuar dhe qindra kanë përfunduar në burg që kur Presidenti Alexander Lukashenko u shpall fitues i zgjedhjeve presidenciale të 9 gushtit, të cilat opozita thotë se ishin manipuluar.
Në një e-mail për Reuters, Biden mbështeti “shprehjet paqësore të lirisë” dhe kërkesat e protestuesve për zgjedhje të reja.
Ai gjithashtu insistoi në lirimin e disa udhëheqësve të opozitës, të cilët ai i quajti “të burgosur politikë”.
“Presidenti Trump refuzon të flasë kundër veprimeve të Lukashenkos ose të ofrojë mbështetje personale për lëvizjen pro-demokracisë,” tha Biden.
Lukashenko u inaugurua papritmas dhe fshehurazi të Mërkurën, të njëjtën ditë kur media amerikane raportoi se Trump nuk pranoi të angazhohej për një transferim paqësor të pushtetit nëse ai humbi ndaj Biden në zgjedhjet presidenciale të 3 nëntorit.
“Një president që fshihet me frikë nga qytetarët e tij duke refuzuar të pranojë vullnetin e popullit, është një shenjë e një autokrati të dobët, të paligjshëm, jo të një udhëheqësi të fortë,” tha Biden.
Trump dhe Biden kanë debatin e tyre të parë të martën dhe midis temave do të jenë “raca dhe dhuna në qytetet tona”, thanë organizatorët. /tesheshi.com/
