Presidenti i ri i Kosovës, Hashim Thaçi është betuar sot në Kuvendin e Kosovës, para deputetëve.
Ai ka lexuar betimin para deputetëve duke u zotuar se do t’i kryejë punët me përgjegjësi.
“Betohem se tërë fuqinë time do t’ia kushtoj ruajtjes së pavarësisë, sovranitetit dhe integritetit territorial të Republikës së Kosovës, sigurimit të lirive dhe të të drejtave njerëzore e qytetare, respektimit dhe mbrojtjes së Kushtetutës dhe ligjeve, ruajtjes së paqes dhe mirëqenies së të gjithë qytetarëve të Republikës së Kosovës dhe me ndërgjegje e përgjegjësi do t’i kryej të gjitha detyrimet e mija”, ka thënë Thaçi.
Pas betimit, presidenti i ri Thaçi, ka mbajtur fjalimin e tij para deputetëve ku ka thënë se sot është një moment i veçantë në jetën e tij, duke e quajtur moment krenarie.
Thaçi vlerësoi e punën e presidentes Atifete Jahjaga për shërbimin 5-vjeçar në drejtim të vendit.
Këtë seancë e bojkotuan partitë opozitare VV, AAK dhe NISMA.
Ndërkohë që presidenti i ri po mbante fjalën e tij të parë në këtë pozitë, Kuvendi i Kosovës është goditur me gurë nga jashtë.
Ende nuk dihet se kush e ka bërë këtë veprim, ndërsa si pasojë e tij janë thyer disa xhama. /tesheshi.com/
